Тяниень пингонь мокшень кяльса эльбятьксфтома сёрмадомась
(кемокстаф 2008-це кизоня ноябрьста ётафтф кялень конференцияса)
Гласнай и согласнай вайгялькснень букваса няфтемасна
Мокшень кяльса вайгяльксне явовихть кафта оцю юромга: гласнайга и согласнайга.
Мокшень кяльса 7 гласнай вайгялькст: а, о, у, и (ы), э, ä, ъ. Сёрмадомста синь няфневихть кефкие о, а, у, и, ы, э, е, ё, ю, я, ъ гласнай букваса: А вайгялькссь няфтеви: а) а букваса калгода согласнайда меле: ава, кал, каль, шра, търва, нал, варма; б) я букваса ляпе согласнайда меле: сяка, урядамс, сява, сюволямс. О вайгялькссь няфтеви: а) о букваса калгода согласнайда меле: сон, колма, тол (валть песа – аньцек рузонь кяльста сявф валса: кино, бюро, но вина - вино); б) ё букваса ляпе согласнайда меле: сёра, сёвонь, тёждя. У вайгялькссь няфтеви: а) у букваса калгода согласнайда и шипящайда меле: кулу, суд, ожу, ур, ёжу, ушу, вашу; б) ю букваса ляпе согласнайда меле: люкамс, цють, нюрям. Э вайгялькссь няфтеви: а) э букваса валть ушетксса: эряви, эряф, эвгонь; б) е букваса васенце слогса ударения ала и фкя слогста ащи валхнень песа: сенем, нельгомс, ве, пе. И (ы) вайгялькссь няфтеви: а) и букваса ляпе парнай и аф парнай согласнайда меле: сиде, аварди, ки; б) ы букваса калгода парнай согласнайда меле: сый, саты, маты. Ингольце рядонь кели ä вайгялькссь няфтеви: а) э букваса валть ушетксса: эзем, эрьхке, эши; б) я букваса валть кучкаса и песа: сярьге, тядя, пря. Кучка рядонь, кучка кеподемань ъ вайгялькссь няфтеви: а) ъ букваса валть ушетксса и васенце слогса: ърдаз, сърхкамс, търва; б) е букваса валть кучкаса ляпе парнай согласнайда, шипящайда и ч аффрикатада меле: кялемс, вятемс, вежендемс, кяшемс, ащемс, почедомс; валть песа ляпе парнай и аф парнай согласнайда меле (къда валть васенце слогса моли ингольце рядонь гласнай): пине, сире, пильге, кяме; в) о букваса аф васенце слогса калгода парнай или аф парнай (шипящайда башка) согласнайда меле: курок, кандомс, сапонь; г) а букваса валть песа калгода парнай и аф парнай (къда васенце слогса моли аф ингольце рядонь гласнай) согласнайда меле: офта, панда, колма, карга, ваша. Тяда башка, гласнай букватне мокшень кяльса няфнихть и вайгяльксонь сюлмафкст, кепотьксонди: е буквась няфни йъ вайгяльксонь сюлмафкс: няемс, аердомс; ё буквась няфни йо вайгяльксонь сюлмафкс: ёмла, ёрдамс; я буквась няфни йа вайгяльксонь сюлмафкс: явомс, куяр; йä вайгяльксонь сюлмафкс: куя, сяярь; ю буквась няфни йу вайгяльксонь сюлмафкс: юр, пою.
Мокшень кяльса 33 согласнай вайгялькс: п, б, ф, в, м, ц, ц', ч, т, т', д, д', с, с', з, з', ш, ж, н, н', л, л', Л, Л', р, р', Р, Р', Й, й, к, г, х. Сёрмадомста сембе 33 вайгялькснень няфтемс тевс ноляви 21 буква: б, в, г, д, ж, з, й, к, л, м, н, п, р, с, т, ф, х, ц, ч, ш, щ. Кайги (б, в, г, д, ж, з, й, л, р, м, н) и аф кайги (п, ф, к, т, с, х, ц, ч) вайгяльксне няфневихть башка букваса: кода - кота, коза - коса, ужа - уша, увамс - уфамс, ваган - вакан, каба - капа.
Мокшень кяльса согласнай вайгялькснень ляпошисна няфневи:
а) я, е, ё, ю, и букватнень вельде: сялгомс, сюдомс, седи, сёвонь, сире; б) ь буквать вельде: каль, пелькс, ведь, пяльхкя, арьсемс. Фалу сёрматкшневи ь буквась валть песа ляпе парнай согласнайда меле, валть кучкаса – аньцек калгода парнай и аф парнай согласнайда инголе ляпе согласнаень няфтемс: ведь, марь, кядь; кядьста, карькс, но кядня, мяндсть.
Ляпе л согласнайда меле, кода валть кучкаса, станя и валть песа, фалу путневи ь буквась, аф ваномок сянь лангс, ляпе или калгода согласнай моли мельганза: тяльме, вальмя, кальсь, кяльса. Къда валса фкя-фкянь мельге молихть кафта или сяда лама согласнайхть, ляпошиц няфневи аньцек мекольцеть: кярьмодсть, стирсь, мирдть.
Мокшень кяльса аф кайги сонорнай Л, Л’, Р, Р’ согласнай вайгяльксне няфневихть лх, льх, рх, рьх буквань сюлмоса: калхт, пеельхть, мархтон, сяярьхть. Аф кайги сонорнай Й согласнай вайгялькссь няфневи: а) йх буквань сюлмоса: пейхть, вейхкса; б) х букваса, къда инголенза моли и или ы гласнай букватне (тяза аф сувайхть фкя слогонь валхне): молихть, кандыхть, но вийхть, сыйхть. Мокшень кяльса щ букваса няфневи шч вайгяльксонь сюлмось: щава, щятя, ащемс. Кафтонзаф согласнайсь мокшень кяльса няфневи кафта фкя лацонь букваса: ваннемс, тюсса, тядде.
Валхнень марса, китькскя вельде и башка сёрмадомасна
Марса мокшень кяльса сёрмадовихть: 1) сложнай валхне: штатол – шта и тол; карупанга – кару и панга; модаватракш – мода и ватракш. Сложнай валкс эрявихть лувомс стама валхне, конатнень кафта или сяда лама юрснон смузьсна марса тиихть лия башка смузь. Сложнай валть фкя ударенияц и васенце пяльксоц аф полафневи, ёткозост аф путови лия башка вал: капстася'ярь – капста и сяярь; павазтя'ште – паваз и тяште; 2) -ши, -пяль, -пула, -пал, -пря, -пе, -пес, -пачк, -перьф, -шовор, -потма, -пяле -тула, -търва, -недь, -шире, -ланга, -пелькс, -инголь, -фтал, аффиксоиттне: мазыши, вирьпула, валпе, ярхцампяль, ляйпря, пялеши, пялеки; 3) -лефкс, ава-, атя- пяльксне: пинелефкс, саразлефкс; атяката, авапине; -ак, -як, -гак, -вок, -ге, -га, -ка, -ке, -нга, -ака, -яка частицатне: киньге, монга, корхтака, велетьке, Мишавок, тиньге, кивок; 4) сложнай числительнайхне: кефкие, кемгафтува, кемголмува, кемнилие, кеветие, кемготува, колмогемонь, сизьгемонь.
Китькскя вельде сёрмадовихть:
1) парнай валхне: атят-бабат, лисемс-сувамс, щаф-каряф, шумбра-пара, кафта-колма;
2) -бъди, кой-, кати- частицатне: кие-бъди, кой-кода, кати-мезе;
3) аф определеннай местоимениятне: кие-кие, мезе-мезе, кодама-кодама, кона-кона, кати-кодама, мъзяра-мъзяра;
4) кой-, -бъди, кати-, -кърда, -повсь частицатнень мархта тиф наречиятне: кой-коза, кати-мъзярда, коса-повсь, ламонь-кърда;
5) междометиятне, конат азовихть кафксть или сяда ламоксть: ой-ой, вай-вай-вай.
Башка мокшень кяльса сёрмадовихть:
1) составной лепне: вирень ксты, акша панчф.
Составной валкс мокшень кяльса лувондовихть стама валхне, конат ащихть кафта или сяда лама башка сёрмадови валста и тиихть фкя смузь, коса: а) васенце пялькссь – относительнай прилагательнай: паксянь шурьхкя; б) васенце пялькссь – качественнай прилагательнай: сенем панчфкя; в) васенце пялькссь – числительнай: колма пильгонят; г) васенце пялькссь – деепричастия: ласькозь ласькомс; д) мъзярда фкя валсь – инфинитив: эсь прянь аралама; 2) пялес пялькс мархта валхне: пялес верок, пялес кулоф; 3) къда васенце пялькссь – отглагольнай лем: шнама васта, лоткама васта. 4) валмельгаксне: модать лангса, модать ала, модать вельхксса; 5) союсне (составнойхне): сяс мес, кода стане. Колма, ниле пяльксста ащи составной валхне сёрмадовихть башка: равжа пря куй, од рьвянянь шама лопа. Мяльс сявоманди: марса сёрмадовихть составной валхнень ся пялькссна, конат лувовихть ни сложнайкс: татаравань пинёркш, вирявань панчф.
Рузонь кяльста сявф валхнень сёрмадомасна 1. Мокшень кяльти суваф кунардонь пингонь валхне сёрмадовихть традицияс коря: беряк, цюгун, бука. 2. Мекольдень пингонь суваф валхнень эса улихть тяфтама полафкст: а) валхне, конат рузонь кяльса аделавихть согласнаень сюлмоса и мекольцесь эздост сонорнай, мокшень кяльса пезост полаткшневи а или я гласнай буква: комбайн – комбайна, лиризм – лиризма, театр – театра, бассейн – бассейна, ансамбль – ансамбля; б) валхнень песа, конат рузонь кяльса ушетксонь формаса аделавихть о, ё, е букваса, мокшень кяльса сёрмадови а или я гласнай: пера – перо, копья – копьё. Лия кяльста суваф валхнень эзда прилагательнайхне сяда сидеста тиевихть -нь суффиксть вельде: театра – театрань, хозяйства – хозяйствань; лия валхнень эса рузонь кялень прилагательнайть пец полафтови -ай, -яй песа: средняй – средний, школьнай – школьный. Собственнай лепнень эса, конат аделавихть -ск, -цк суффиксса, полаткшневи -яй: Краснослабодскяй, Краснослободскяйста, Братскяй, Братскяйса.
Оцю букватнень тевс нолдамасна Валрисьмонь васенце валсь фалу сёрматкшневи оцю букваста. Точкада, кизефтемань и ювадемань тяштеняда, а станя жа валрисьмоть песа ащи колма точкада меле валсь ушеткшневи оцю букваста: – Да? Тя пара (Бебан). – Чо! Саты (Моисеев). – Ожу, ожу… Озафтк седицень (Моисеев). Мокшень кяльса оцю букваса сёрмадовихть: а) лепне, алянь лепне, фамилиятне: Илья Максимович Девин; б) жуватань лепне: Валет пинесь, Маня тракссь; в) географическяй и административно-территориальнай лепне: Россия, Саранскяй; г) историческяй эпохань и событиянь лепне: Древняй Римсь, Великай Отечественнай войнась; д) мяляфтови илань, религиознай праздниконь лепне: Од киза, Роштува, Тройця; е) организациянь, учреждениянь, предприятиянь лепне: Государственнай Думась, Федеральнай Собраниясь; ж) документонь, сире пингонь памятниконь лепне: Российскяй Федерациянь Конституциясь; з) должностень и званиянь лепне, орденонь, медалень, отличиянь знакнень лемсна: Российскяй Федерациянь Президентсь, Якстерь Знамянь орденць; и) литературнай произведениянь и печатень оргаттнень лемсна: «Масторава» народнай эпоссь, «Мокша» журналсь; к) кирьфтаф валхне и аббревиатуратне: РМ ( Мордовия Республикась), НИИ (научно-исследовательскяй институтсь); л) условнай собственнай лепне: Сёрмадысь, Издательствась.
Морфологическяй принципть коряс сёрмадовихть: 1. Лувксова, падежга существительнайхнень и лицава глаголть полафнемасна. Башка тяштькс: р, рь, л, ль, й согласнайса аделави валъюрхттне сёрмадовихть фонетическяй принципть коряс: мокорь – мокорьхть, тол – толхт, сый – сыйхть.
1.1 лама лувксонь няфти -т (-ть) суффиксть инголе согласнайхне: вазт - ваз, саразт - сараз, рузт – руз, кудт – куд, ловт – лов, ковт – ков; 1.2 основной склонениянь местнай, исходнай, вносительнай падешнень песна сонорнай -н и -нь согласнайда меле: нармоньса, нармоньста, нармоньс – нармонь; санса, санста, санс – сан; ломаньса, ломаньста, ломаньс – ломань; 1.3 указательнай склоненияса -н и -нь согласнайда меле сь падежень песь: ломансь, сумансь, нармонсь; 1.4 указательнай склонениянь лама лувксонь падежень петнень инголе согласнайхне: кудтне, кудтнень, кудтненди - куд; розтне, розтненди - розь; сумантне, сумантненди - сумань; 1.5 притяжательнай склонениянь -н и -нь согласнайса шумордави валхнень эса местнай, исходнай падежень суффиксть ушетксоц: суманьсон, суманьсот, суманьсонза - сумань; 1.6 основной склонениянь местнай, исходнай, вносительнай падежень и указательнай склонениянь сембе падежга -д, -дь, -т, -ть согласнайса аделави валъюрхтсь: кудса, кудста, кудс; кудсь, кудть, кудти - куд; недьса, недьста, недьс; недсь, недть, недти - недь; ведьса, ведьста, ведьс; ведсь, ведть, ведти - ведь; кроватьса, кроватьста, кроватьс; кроватсь, кроватть, кроватти - кровать; 1.7 лама лувксса -м согласнайса шумордаф валхне: утомт – утом, водоёмт – водоём, объёмт – объём, шужгомт – шужгом, нюрямт - нюрям;
1.8 -б, -г (-га, -ге), -д, -дь (-да, -де) согласнайхне отложительнай (-та) и изъятельнай (-фтома) падежень петнень инголе: ведьта, ведьфтома – ведь, срубта, срубфтома – сруб; садта, садфтома – сад, магта, магфтома – маг; яксяргта, яксяргфтома – яксярга; пандта, пандфтома – панда; мирдьта, мирдьфтома – мирде; 1.9 -дс, -дсь, -дьс, -тс, -тсь, -тьс сюлмафксне глаголса: кандсь, кандса; вятсь, вятьса; петсь, петьса 1.10 согласнайхне понудительнай залогонь -фт суффиксть инголе: андфтомс - андомс; кандфтомс - кандомс; 1.11 глаголонь кошардомань наклонениянь 2-це лицань фкя лувксонь форматне: кадт - кадомс; панть – панемс; келемть - келемомс; лувт – лувомс; шувт – шувомс. Башка тяштькс: р, рь, л, ль, й согласнайса аделави валъюрхттне сёрмадовихть фонетическяй принципть коряс: поремс – порьхть, молемс – мольхть, тиемс – тийхть. 1.12 глаголонь объектнай спряжениянь «тонь» рядонь форматне: кандтя, кандтанза, кандтядязь – кандомс; сявтя, сявтянза, сявтядязь – сявомс; Башка тяштькс: р, рь, л, ль, й согласнайса аделави валъюрхттне сёрмадовихть фонетическяй принципть коряс: порьхтя, порьхтянза, порьхтядязь – поремс, кульхтя, кульхтянза, кульхтядязь – кулемс. 1.13 глаголонь изъявительнай наклонениянь тяниень-сай пингонь 1-це и 2-це лицань лама лувксонь суффиксть инголе валъюрхтсь: кандтама, кандтада – кандомс; валгтама, валгтада – валгомс; лувтама, лувтада - лувомс. Башка тяштькс: р, рь, л, ль, й согласнайса аделави валъюрхттне сёрмадовихть фонетическяй принципть коряс: порьхтяда, порьхтяма – поремс, кольхтядя, кольхтяма – колемс. 1.14 ётай пингонь страдательнай причастиянь суффиксть инголе валъюрхтонь мекольце согласнайсь: кандф – кандомс, пандф – пандомс, лядф – лядомс, норгф – норгомс, сёлгф - сёлгомс (но: путф – путомс).
2. Валонь тиемста:
2.1 сложнай валть омбоце пяльксонц ушетксса согласнайхне, къда сложнай валхнень пялькссна молихть апак колак: ведькев - ведь и кев, ведьпине – ведь и пине; эйсюра – эй и сюра; 2.2 -ши, -пяль, -пула, -пал, -пря, -пе, -пес, -пачк, -перьф, -шовор, -потма, -тула, -търва, -недь, -шире, -ланга, -пялькс, -инголь, -фтал, -лефкс, -ава, -атя аффиксоиттне: мазыши, вирьпула, валпе, ярхцампяль, ляйпря, ведьтърва, нолготула, ласькомпачк, цянгопал, тарадпе, вайгяльпе, вирява, озатя;
2.3 -кя уменьшительно-ласкательнай суффиксть инголе кайги согласнайхне: тарадкя - тарад; саразкя - сараз, коробкя - короб, крандазкя - крандаз; 2.4 -кс суффикс вельде тиф существительнайхне, конатнень валъюрхтсна шумордави -д согласнайса: недькс – недь, кядькс – кядь; эльбядькс - эльбядемс, сярядькс - сярядемс, поладкс - поладомс; 2.6 глаголонь лама-кърдань -се-, -кшн- суффикснень инголе согласнайсь: норгсемс – норгомс; урядсемс – урядамс; сёрмадкшнемс – сёрмадомс; 2.7 глаголонь лама-кърдань -се- суффикссь -н и -нь согласнайда меле: ансемс – анамс, пансемс – панемс.
Фонетическяй принципть коряс сёрмадовихть: 1) исходнай формаса аф производнай валъюр мархта валхне: а) существительнайхне: ава, варма, кал, нал, мар, сал, тоду, кавал, куд; б) прилагательнайхне: од, ару, эзрай; в) местоимениятне: мон, тон, сон, минь; г) кой-кона глаголхне: самс, тумс, прамс; д) служебнай корхтама пяльксне (валмельгаксне: башка, ваксс, вакска, малас, малава; союсне: и, но, да, прокс; частицатне: вов, вана, ни); ж) междометиятне и вайгяльксонь няфти валхне: вай, ух, буль, ай, уф, ну; 2) основной, указательнай, притяжательнай («тонь» рядонь) склонениянь лама лувксонь форматнень тиемста р, рь, л, ль, й согласнай букваса аделави валъюронь морфематне: вирьхть, вирьхне – вирь; кальхть, кальхне – каль; куйхне – куй; 3) сложнай числительнайхне: кефкие, кемгафтува, кемготува, кодгемонь, сизьгемонь, вейхксогемонь; 4) валхне, конатнень пялькссна юмафтозь эсь смузьснон: ведьгърма, кузбол; 5) валъюронь морфемань варианттне: нолга – нулгодемс, кодамс – котф; 6) суффиксальнай морфематнень вариантсна: ацам (валпень а вайгялькссь прась), туфцем.
Традиционнай принципть коряс сёрмадовихть: 1) лафча гласнай вайгялькссь, кона няфтеви ъ, о, е, а букваса: ърдаз, кадомс, вятемс, сире, офта; 2) ингольце рядонь кели ä-сь, кона няфневи э, я букваса: эшелямс, эзем, сявомс, кяме; 3) сонорнай согласнайда меле з, ж букватнень сёрмадомасна дз, д’з’, дж, д’ж’ фонемань варианттнень вастс: а) валъюронь морфемаса: варжамс, панжемс, унжа, пульзямс, инзамс; б) суффиксальнай морфемаса: сявтянза, кандтанза; стиренза, кядензон, пиленза. 4) ж, ш согласнайда меле и букваса ы вайгялькссь: а) фкя слогста ащи валхнень песа: кши, ши; б) сложнай валса: стакши; в) абстрактнай существительнайхнень эса: мазыши, одксши; г) качественнай прилагательнайхнень песа: кяжи; д) тяниень-сай пингонь 3-це лицань фкя и лама лувксонь глаголонь форматнень эса: веши, вешихть; пужи, пужихть.
Прилагательнайхнень сёрмадомасна
Лама сёрмадомань правилатне тяса тяфтамот, кодамот нолявихть тевс существительнайть сёрмадомста.
1. Лама лувксонь няфти –т (-ть) суффикста инголе кайги согласнайхне аф ётайхть аф кайгикс: вадяв - вадявт, сенем - сенемт.
Башка тяштькс: р, рь, л, ль, й согласнайса аделави валъюрхттне сёрмадовихть фонетическяй принципть коряс: якстерь – якстерьхть, откорь – отькорьхть.
2. Прилагательнайхнень песа сёрмадови я буква, къда лама лувксса аделавихть -ат, -ят песа: валазя – валазят (валаз'ат), тюжя – тюжат (т'ужат); лия валса сёрмадови е: сире – сирет (с'ир'ът), сиде – сидет (с’ид’ът). -да, -де, -та, -те, -га, -ге, -ка, -ке сюлмоса аделави прилагательнайхнень эса прашенды мекольце гласнайсь: коське – коськт, наксада – наксадт, нарде - нардть.
3. Рузонь кяльста сявф прилагательнайса -ск, -цк суффикста меле сёрмадови -яй пе: ткацкяй, космическяй, лия валса –ай: рабочай, шахматнай, литературнай; сёрмадови -ой пе, къда ударениясь прай о-ть лангс: боевой, трудовой.
Числительнайхнень сёрмадомасна
1. Сложнай числительнайхне сёрматкшневихть фонетикань принципть коряс. Мокшень кяльса сложнай числительнайкс лувовихть:
1) числительнайхне 11 сявомок 19 молемс:
11 – кефкие 14 – кемнилие 17 – кемзисемге 12 – кемгафтува 15 – кеветие 18 – кемгафксува 13 – кемголмува 16 – кемготува 19 – кевейхксые
2) десяткань лепне:
30 – колмогемонь 70 – сизьгемонь 40 – нильгемонь 80 – кафксогемонь 50 – ведьгемонь 90 – вейхксогемонь 60 – кодгемонь
2. Явомань и приблизительнай лувксонь числительнайхне сёрмадовихть китькскя вельде: кафтонь-кафтонь, котонь-котонь; кафта-колма, вете-кота, кафтошка-колмошка.
3. Пуроптомань числительнайхне тиевихть лувксоннетнень эзда -нц, -цьке, -ксне, -нек суффикснень вельде: ветенц, кафцьке, колмоксне, ниленек. Парнай существительнайхнень мархта тевс нолдавихть -нц суффиксть вельде тиф пуроптомань числительнайхне: ниленц кямот, кафонц карьхть.
4. 21 сявомок 29 молемс числительнайхне лувовихть составнойкс: комсь фкие, комсь кафтува, комсь колмува, комсь нилие, комсь ветие, комсь котува, комсь сисемге, комсь кафксува, комсь вейхксые.
Местоимениятнень сёрмадомасна
1. Аф определённай местоимениятне сёрмадовихть китькскя вельде: кие-кие, мезе-мезе, кодама-кодама. Тяфта жа китькся вельде сёрмадови фкя-фкянь взаимно-личнай местоимениясь: фкя-фкянди, фкя-фкаста.
2. кати-, кой-, -бъди частицатне местоимениятнень мархта сёрматкшневихть китькскя вельде: кати-коста, кой-мезе, кие-бъди;
3. -вок, -нге, -нга, -га, -ге, -ка, -ке частицатне сёрматкшневихть марса: кивок, монга, миньге.
Наречиятнень сёрмадомасна
1. Ингольце рядонь кели ä вайгялькссь наречиятнень песа фалу сёрмадови я букваса: салаваня (салаван'ä), валомня (валомн'ä), станя (стан'ä);
2. кой-, -бъди, кати-, -кърда, -повсь частицатнень мархта тиф наречиятне сёрмадовихть китькскя вельде: кой-коза, кати-мъзярда, коса-повсь, ламонь-кърда.
3. -пачк, -шовор, -перьф аффиксоиттнень мархта тиф наречиятне сёрмадовихть марса, кирдемок морфологиянь принципть: молемпачк, кизоньперьф, шоподемшовор.
Служебнай корхтама пялькснень сёрмадомасна
1. Валмельгаксне мокшень кяльса фалу сёрматкшневихть башка: модать лангса, модать ала, модать вельхксса.
2. Союсне (составнойхне) сёрмадовихть башка фкя-фкянь эзда: сяс мес, кода станя; и, да, или союснень инголи аф путневи явфтомань тяштеня, къда синь сотнихть кафта однороднай члетт: тума и келу.
3. кати-, кой-, -бъди частицатне валхнень мархта сёрматкшневихть китькскя вельде: кати-кие, коста-бъди, кой-кодама; -га, -ге, -ка, -нга, -вок, -а, -е, -ака, -яка частицатне – марса: монга, корхтака, велетьке, Машавок; ли, на, ина, жа, ба, аф, аш, апак частицатне – башка: тят яка, сон ли, аф морай, аш тяса.
4. Сложнай междометиятне, звукоподражательнай валхне, конат азовихть кафксть или сяда ламоксть, сёрматкшневихть китькскя вельде: ой-ой, фу-у-у, къс-къс, динь-динь-динь.
Строчкаста строчкас валхнень ётафтомасна
1. Лия строчкас валхне ётафневихть слогонь-слогонь: кол-ма, веле-ста. Къда валса лама согласнай, эста сяда пара аф колсемс сонь пяльксонзон: куд-стонза, валго-мста, од-кстомомс, кяд-тне, тиендь-сазь.
2. Аф кадондови строчкать пес и аф ётафневи омбоце строчкати валть пяльксоц, коса аш слог.
Аф эряви: Эряви: морсе-сть мор-сесть кантфтса-ськ кантфт-саськ сиретн-ень сирет-нень сн-афнень снаф-нень
3. Аф эряви явфнемс согласнайсь мельганза моли гласнайть эзда.
Аф эряви: Эряви: пан-емс па-немс вид-еста виде-ста ал-аша ала-ша сиз-емс си-земс
4. Аф эряви явфнемс й буквась инголенза ащи гласнайть эзда.
Аф эряви: Эряви: па-йге пай-ге ля-йхне ляйх-не му-йне муй-не
5. Аф эряви кадондомс строчкать пес и ётафнемс омбоцеть ушетксс фкя лацонь кафта согласнайхть.
Аф эряви: Эряви: ка-ннемс кан-немс максс-ихть макс-сихть касс-аса кас-саса ко-ммунизма ком-мунизма
6. Аф эрявихть явфнемс ъ, ь букватнень инголест ащи букватнень эзда: кель-гомс, кель-ме, валь-мя, валъ-юр, подъ-езд, разъ-езд.
7. Аф явфневихть фкя-фкянь эзда букватне, конатнень мархта няфневи фкя согласнай вайгялькс: вельх-тямс, куйх-не, марьх-не.
8. Аф эрявихть аерфнемс фкя слогста ащи кирьфтаф сложнай валхнень пяльксснон.
Аф эряви: Эряви: спе-цодежда спец-одежда горк-ом гор-ком
9. Аф эрявихть явфнемс аббревиатуратнень, конат сёрмадовихть кода аньцек прописной, стане и марса прописной и строчнай букваса или цифра мархта прописной букваса: ООН-ць, МИД-са, ТУ–104.
10. Аф кадондови строчкать пес и аф ётафневи омбоцети фкя буква.
Аф эряви: Эряви: кудс-а куд-са а-нокламс анок-ламс
Оргкомитетть мярьгоманц коряс норматнень аноклазь:
Алямкин Н.С., ф.н.к., Н.П. Огаревонь лемса МГУ-нь мокшень кафедрань профессорсь;
Келина А.Н., ф.н.к., доцентсь, Мордовия Республикать Правительстванц видеса гуманитарнай наукатнень коряс НИИ-нь кялень отделть вятиец;
Малькина М.И. ф.н.к.;
Макушкина Л. И., ф.н.к., М.Е. Евсевьевонь лемса МГПИ-нь мокшэрзянь кафедрань доцентсь;
Поляков О.Е. ф.н.д., Н.П. Огаревонь лемса МГУ-нь профессорсь, мокшень кафедрань вятись