Пос

Материал из Wiki FU-Lab
Перейти к навигации Перейти к поиску

Комиын туй овмoслы торйoдoм 9 миллиард шайтысь видзисны сoмын джынсo Коми народное радио 30.10.2012


Комиын туй овмӧслы торйӧдӧм 9 миллиард шайтысь видзисны сӧмын джынсӧ. Та йылысь республикаын каналан сӧветса президиумлӧн заседание дырйи юӧртіс регионса туй агентствоӧн веськӧдлысь Эдуард Слабиков. Сылӧн кывъяс серти, кызвын сьӧмыс кольӧма Сыктывкар-Ухта туй капитальнӧй дзоньталӧмысь. Мӧвпалісны видзны 4 да джын миллиард шайт, а артмис сӧмын 3 да джын. «Ухтаса завод таво дугдіс лэдзны битум, тайӧ торкис асфальт вӧчан заводлысь уджсӧ. Ылӧсас уджавны ми ог кӧсйӧй — бурджык вӧчны этша, но бурджыка, а кольӧм сьӧмсӧ вуджӧдны локтан во вылӧ», - пасйис Эдуард Слабиков. Сідзжӧ сійӧ пасйис, мый республика эз ло дась сы кежлӧ, мый туй овмӧслы сьӧм 4 да джын миллиард шайтсянь содтісны 9 миллиардӧдз. Подрядчик пӧ оз вермы вӧчны уджсӧ республикаса туйяс вылын, мый нин висьтавны муниципалитетъяс йылысь. Сӧмын Сыктывкар-Ухта трасса дзоньталӧм вылӧ подрядчиклы ковмис ньӧбны асфальт вӧчан 3 выль завод, видзны татшӧм сьӧм муниципалитетъяс вылӧ сылы абу зеп серти. Локтан воын пӧ серпасыс шылялыштас, сэки туй овмӧслы мӧвпалӧны торйӧдны 4 сайӧ миллиард шайт.

Маргарита Колпащикова водзo кутас веськoдлыны общественнoй палатаoн. Коми народное радио 06.11.2012

Палаталӧн выль состав ӧтсӧгласӧн ошкис сылысь кандидатурасӧ. Пленарнӧй заседание муніс ноябр 3-ӧд лунӧ Сыктывкарын. Коми Республика Юралысь да правительство нимсянь общественникъясӧс чолӧмаліс Юралысьӧс медводдза вежысь Алексей Чернов, сідзжӧ юӧртіс, кутшӧм, сы серти, могъяс сулалӧны талун палата водзын. Колӧ пӧ веськӧдны вынъяс олысьясӧс да властьӧс йитысь общественнӧй инфраструктура лӧсьӧдӧм вылӧ. Алексей Чернов дась сетны общественникъяслы тайӧ нырвизьын удж кузя быд сикас отсӧг. Водзӧ общественнӧй палатаын зільысьяс бӧрйисны веськӧдлысьӧс вежысьясӧс — заместительясӧн лоины Петр Байда, Роман Койдан да Валентина Кулимова, да урчитісны 8 комиссия да комиссияяскостса 3 уджалан группа.


Комиын 49 сиктса бурдoдысьлы таво сетісны «ышoдан» миллион шайтoн. Коми народное радио 07.11.2012

Республикаса дзоньвидзалун видзан министерстволӧн юӧр серти, во помӧдз компенсация колӧ мынтыны нӧшта 12 мортлы, заявкаяс ыстісны федеральнӧй ФОМС-ӧ. Врачьяс кындзи 350 сюрс шайта ӧтпырся вештӧд воис Изьва, Чилимдін, Луздор, Сыктывдін, Кӧрткерӧс да Сыктыв районъясса ФАПъясын зільысь 6 фельдшерлы. Нӧшта кык шыӧдчӧм видлалӧны на. Казьтыштам, республикаса Правительстволӧн тавося февраль 14-ӧд лунся шуӧм серти, 1 миллион шайта ышӧдан ӧтпырся вештӧд мынтӧны сиктын уджалысь 35 арӧсӧдз том бурдӧдысьяслы, 350 сюрс шайтӧн — сиктын зільысь том фельдшеръяслы. Сетӧм сьӧмсӧ позьӧ видзны быд мог вылӧ.

Ухтаса Борoвoй поселокысь неминучаo веськалoм йoзлы вайисны медводдза гуманитарнoй отсoг. Коми народное радио 08.11.2012


Казьтыштам, ноябр 3-ӧд лунӧ посёлокас сотчис 16 патераа пу керка. Би нюлыштіс 180 квадрата метр. «Унаӧн зільӧны отсавны неминучаӧ веськалӧмаяслы — коді кӧлуйӧн, коді сьӧмӧн. Мукӧд семьяыс колис патератӧг да воштіс уна воӧн нажӧвитӧм став овмӧссӧ. Та вӧсна быд сикас отсӧглы найӧ лоӧны радӧсь», - висьталісны ухтаса администрацияын. Ноябр 7-ӧд лунӧ велӧдан управлениеын уджалысьяс нуисны посёлокӧ медводдза партия кӧлуй, кодӧс сеталісны Ухтаса олысьяс да 3-ӧд номера школаын зільысьяс. Тайӧ вольпас кӧлуй, полотенцеяс, тасьті-пань, шоныд кӧлуй да пледъяс — ставыс, мый медъёна колӧ ӧтуволанінӧ овны кольччӧм йӧзлы. Быд окотитысь вермас отсавны сотчӧм керкаысь олысьяслы. Семьяяс окотапырысь примитасны пызан-улӧс, вылыс паськӧм, кастрюляяс да скӧвӧрдаяс, шебрас да юрлӧсъяс, бытӧвӧй техника да сьӧм.