Пос

 <>

• * *

Еджыд вой, Еджыд вӧт. Еджыд ловлӧн Еджыд бордъясыс Еджыдас сибдӧны. Эськӧ гусьӧник Кыв ЙЫЛӦН ВИДЛЫНЫ - Юмов еджыдыс Али жӧ сола...

<>

• * *

Тэ важӧн гӧтыра и котыра, Сьӧд ускыд пужъялӧма, чорыд. А менам сьӧлӧм садьтӧг потӧ на Да садьтӧг аддзысьӧмысь полӧ. Кӧть, гашкӧ, мелань он и видзӧдлы, А видзӧдлан кӧ, он на-й тӧдмав. Но ойдас муслун, кодӧс видзи ме Та дыра кыкнаннымлысь ӧтнам...

<>

• * *

Сэтшӧм ӧдйӧ локтіс мустӧм асылыс, Эг на ньӧти слӧймӧй воны ас садьӧ, Колӧ прӧщайтчыны, Прӧщайтчыны-торъявны, Сьӧлӧм вужъяснымӧс вир петтӧдзыс орӧдны. Тӧвся войыд ёна кузь пӧ, шуласны, Сӧмын сыын эз тай вичмы Пӧттӧдз туплясьны. Позьтӧм шудтӧ, быттьӧ синва, нюлыштім. Янсӧдчим. А, збыль вылас кӧ, кулыштім...

<>

• * *

Ме ог кӧсйы тӧдны, Кодкӧд вӧлін тӧрыт, Кодкӧд лоан аски - Юасьны ог кут. Ме нин шуда сыысь, Олӧмад мый тӧрлі. Бара олӧм сімын Чужи еджыд чут...

<>

• * *

Арӧн локтан Али тулысӧн, Китыр кампетӧн ли Юрлӧсӧн. Мир туй шӧрӧд, Ылі йӧръясті, Кӧртвомавны либӧ бӧрйысьны? Некытчӧ кор лоас воштысьныд Али кӧзяйканад ошйысьны? Гашкӧ, дивитыштны-ӧвсьӧдны, Гашкӧ, выль пӧв олӧм лӧсьӧдны...

<>

• * *

А менам шудлы уна оз и ков, Мед пызан вылын - картупель да сов, А пызан саяс кодкӧ ловъя лов...

<>

• * *

Бӧртӧ локтӧмысь некор эн пов. Лунын, войын кӧть, примита нюмӧн. Сӧмын ӧдзӧсӧс восьты да шу мем: «Некод тэ кындзи, вӧлӧм, оз ков!» Йӧзлӧн сёрниысь юрным оз усь, Вичмӧм муслунным зэлӧдас сӧнъяс... Паськыд му вылас вошӧмыд кӧнъя, Мыйла туй помыд этатшӧм кузь...

<>

• * *

Шлапкысьӧма-усьӧма Эжва юас Гулю рӧма енэжыс. Гӧгӧр туис. Кильчӧ бокӧ шыбитла Дӧмлӧм тывйӧс, Гашкӧ, сэтчӧ пысасяс Зарни кыйдӧс...

<>

• * *

Ӧвсьы, вай, сьӧлӧмӧй, ӧвсьы, Ордлы костӧдыд тадзитӧ тюран, Мойдса кӧвдумӧн ручыдлы сюран, Оз сот кыв йывсӧ ӧгыра пӧсьыд. Ӧтчыд кӧть, донаӧй, кывзысь, Оз ӧд лёкторйӧ мамукыд велӧд. Олӧм юӧдыд та дыра келіг Няньтӧ кӧтлан тай быдсяма пызьысь...

<>

• * *

Сӧмын вежон тэтӧг... Быттьӧ сизим во. Ӧмидз куст да сэтӧр Сизим ар оз во. Сизимӧдысь пышкай Киллис льӧм пу роз. Сизим зэрӧд ПЫШЙИ, - Кыті бара-й кос?! Квайт лун дорӧ - ӧти Быри-воши пем. Тэ эн вежсьы ньӧти, Дзор юрсиа ме...

<>

• * *

Кӧні менам керка-гортӧй, Кӧні менам муса ёртӧй, Кӧні менам рутлӧм бордӧй?.. Гӧгӧр, гӧгӧр куш. Кытысь локта, кытчӧ муна? Вой нин ӧні али лун на?.. Туйлӧн вожыс вӧлі уна, Бӧрйыныс эг куж...

<>

• * *

Вольпасяд мед эськӧ водны кыкӧн. Кытчӧ бара-й, пӧлӧй, вошин. Кытӧн Менсьым шудӧс мый вермӧмсьыд летан, Быттьӧ ыджыд грекысь водзӧс сетан. Локтана кӧ вӧлін, важӧн локтін, Эшкын улысь йизьӧм кокӧс шонтін. Кадыс ӧдӧн чурскӧ муслун пайӧс... Кӧть нин кодӧскӧ мед кильчӧ дорӧ вайис!..

<>

• * *

А зептын сӧмын сизим ур Да ӧти тувъя истӧг кӧрӧб. Тэ меным тавой кӧ он сюр, Став радейтчӧмыс, сідзкӧ, сӧрӧм. И, сідзкӧ, войнас ӧти лов Кывбурыс бӧрся руӧ пӧрас, Ӧд аскомысьыд оз нин ков, Кор ставыс помасьлӧма тӧрыт...

<>

• * *

Позис бергӧдчыны, позис, Юрыд эз на усь, Бӧр кӧ эськӧ лэбин позъяд, Менам еджыд юсь. Мый эн косав, мыйысь полін, Ачыд он ӧд тӧд. Сэтшӧма тэ меным колін, Еджыд дзодзӧг рӧд. Ӧні, сё во кольӧм бӧрад, Каитчи кӧть эн. Выльпӧв олӧмтӧ оз шӧрав Уджӧн тырӧм Ен...

<>

• * *

Некод оз звӧнит, Некод оз пырав. Абутӧм гажӧс Вир петтӧдз йира. Ставныслӧн вуні кӧ, Ставнысӧ вунӧда. Ловлысь веж гусӧ Синваӧн курӧда...

<>

• * *

Кадыс муртса на ӧкмысысь петӧма. Водны водз на, а юсьыны - сёр. Достоевскийӧс бонзьытӧдз летӧма - Джоджын туплясьӧ, вижӧдӧм, нор. Гижтӧм кывбуръяс инасьтӧм ловъясӧн Пемыд сынӧдас шӧйтӧны чӧв, Арся кушинсӧ тыртӧны дойясӧн. Абу ме. Быттьӧ некор эг вӧв...

<>

• * *

Тэ он куритчы, он ю, Сьылан кытшын тэныд делӧ, Но а менӧ он нин велӧд, Оз нин вежсьы менам ру. Татшӧмнас кӧ тэд ог ков, Мед и прамӧйнас ог ковмы. Эг тай кӧсйы тэтӧг овны. Ола! Ола... Быть ӧд ов...

<>

• * *

Вывті жӧ нин пемыд арся рытыс, Вывті жӧ нин шуштӧм гортлань туйыс. Ӧдва содӧ кок туйяслӧн лыдыс. Мый тэ, эськӧ, мекӧд вӧчин, тулыс?! Кыв ӧд сетлін, ог пӧ сэсся вӧрӧд, Эновтча пӧ, пель сьӧдмытӧдз долин! Мусатӧг ме медся шуда вӧлі. Мусатӧг ме медся шудтӧм коли...

<>

• * *

Ме тэнӧ сизим олӧм корси, А вошті ӧти войӧн. И эг ворс быттьӧ, со тай, ворсси, И оз ков мунны. Вои. Ме чайті, сэтчӧ жӧ и кула, Кор аддза гортӧс битӧм. Но сідз жӧ сёя, сідз жӧ юа, Да быдта тэнсьыд питӧ...

<>

• * *

Лэдз менӧ, Ен могысь, лэдз, Быри эбӧсӧй тадзисӧ овныс. Важӧн торъяӧсь - семья и овмӧс, Быдӧн ас кежысь - сьӧлӧмъяс, ловъяс. Лэдз менӧ, мусаӧй, лэдз...

<>

• * *

А ме, мамукӧй, талун дзик код, Тайӧ тулысыс, тулысыс мыжа. Со ӧд, нылукыд тэнад мый ыджда, А вежӧрыс - войт. Вид кӧть нӧйт, сэсся, мамук, ог лӧнь Водзӧ юӧмысь, кытчӧдз ог сотчы. Ачым петі ме дойыслы воча, Ачым орӧді сьӧлӧмысь сӧн...

<>

• * *

Со и помасис ставыс. Эз коль Ичӧт лачатор весиг, кӧть корсьысь. Кутшӧм радейтчӧм чуктӧдан дойсьыд, Кутшӧм лыаысь сӧдзӧдан ёль?! Кодным мыжаӧсь - веськодь. Оз ков Ӧта-мӧднымӧс эскӧдны мырдӧн. Асьным ассьыным шуднымӧс мырддим. Зарни чунькытш эз гӧрӧдав лов...

<>

• * *

Кык час мысти чеччыны, А ме эг на водлы. Лым чиръясыс лэччӧны Енэж содйӧд. Лым чиръясыс пырӧны Кучик улӧ. Висьтав меным, дыр-ӧ на Тэтӧг кувны...

<>

• * *

- Тэ мыйкӧ вунӧд,

медым выльысь кежавны. И мыйлы сэні асъя руыс вежалӧ - Кык верстьӧ мортӧн коркӧ дзеблӧм греклы, Кодысь ми тэкӧд мынтысям со век на?! - Ме уналаӧ быдсямасӧ вунӧдлі И косавлі. И быттьӧ весиг суӧдлі. Но Эжва юад оз позь пырны кыкысь, Кӧть мыйӧн сэсся васаыслы мынтысь...

<>

• * *

Тэ, вай, мун. Дзик пыр мун, Кылан, - ӧні!!! Мед кӧ вой, мед кӧ зэр, Мед кӧ подӧн. Ме пола, мый тэкӧд кӧ вода, Орас сьӧлӧмысь Медбӧръя сӧныс. Киняулад сэк палялас тӧдтӧм. Тӧлысь-шеваӧн Нэм кежлас керӧм. И лоан тэ гӧтыртӧм верӧс, И лоа ме йӧз ньӧрӧн нӧйтӧм...

<>

• * *

Гашкӧ, артмас на, Клеитчас-йитчас. Кадыс, видзӧдлы - Сӧмын на вит час. Тэнад локтӧмӧдз Нелямын лун на. колок, ставыс, мый лоана, Вунас. И ми вермам на ылӧдны. Кодӧс?! Мый огӧ на торъялӧй, Огӧ. Со тэ пыран, со шыбитан ноптӧ. А керкаыд тӧрытсянь овтӧм...

<>

• * *

Бара торйӧдӧны миянӧс. Синваӧс Некытчӧ нин дзебны. Петны Эськӧ тэнад сьӧлӧмысь Да ыбъяс пӧлӧныс Енэж веркӧсӧд, Кыдзи керкасьыд Ӧні. Да ог куж...

<>

• * *

Меным тэрмасьны ӧні некытчӧ, Повны сёрмӧмысь ӧні нинӧмла. Со ӧд, пӧттӧдзыд ме вылын тешитчин, - Абу ловъя ни абу виӧма. Паныд восьлалысь сой пӧлӧд кутыштас: - Гашкӧ, мыйӧнкӧ верма отсавны? - Тэ кӧ Ен, козьнав кокньыда кулыштӧм, Тэ кӧ Омӧль, лэдз муслунлы водзсасьны...

<>

• * *

Сё ӧти лым чирӧн Енэжыс востыма. Сё ӧти лымчиркӧд ӧтгудыр - Пос помад. Сё ӧти лым чирсӧ Гӧликнад ӧвтыштан. Сё ӧти лым чирлы Муслуныд ӧтыджда...

<>

• * *

«Радейтӧ, оз радейт...» Еджыд «синлыс» гылалӧ. Ичӧтик, но надея Сьӧлӧм костӧ ылаліс. Катшасинмӧй, нывъёртӧй, Эскӧмӧс эн пӧръяв. Ӧткалунӧс сывйыштіс Надея, но бӧръя...

<>

• * *

Ме сота тэнсьыд письмӧястӧ. Бисьыс Кӧть шонавлыштас кыткӧ - ки ли кок. Эз кысьы вӧнь ни сикӧтш вӧсни визьсьыс, Сьӧд шыпасъяса надеяыс киссис, Руд тшынӧн кайӧ матысмывтӧм шог. Эз артмы ли, эг кужӧй ли, эг кӧсйӧй, Пӧсь пӧим весиг та йылысь оз тӧд. Ми садьтӧг ӧта-мӧдлысь сьӧлӧм лӧсйим Да тадз жӧ коркӧ ыпнитлім да ӧзйим. Ме сота гижтӧм письмӧяслысь вӧт... Винаным - помавтӧм, Сёрниным - эновтӧм. Морӧсӧй ломалӧ Сыысь, мый пернатӧм, Сыысь, мый тэ бӧрся Вояс эг уськӧдчы. Позьӧмкӧд венласи, Повзьӧмкӧд куритчи. Эбӧстӧм... Эскытӧм... Лэбзьӧм йӧз пӧлянысь. А кутшӧма дзескӧдӧ Вӧляыс...

<>

• * *

«Люблю грозу в начале мая...» А ме майӧдзыс, бурак, ог ов. Шуштӧм ывласьыс морӧсӧй дзездӧма, Синтӧм кутю моз тіралӧ, гегдӧма Ортсӧ войяснас петавтӧм лов. Сэсся некод да нинӧм оз дойд... Тайӧ майыслӧн медводдза гым пырыс Меӧн тэ йылысь лӧсьӧдӧм кывбурысь Артмас тувсовъя, медмича мойд...

<>

• * *

Тэ менӧ эн радейт, эн радейт, Ме гежӧда овлывла садьӧн, Ён табакысь ланьтлытӧг куркса Да вой пытшкас инасьла муртса. Ме ыждалысь, ылӧдчысь, наян, Ме йӧзыслы лёк сӧмын вая... И, гашкӧ, сьӧд зывӧктӧм улад Ме йӧйма да ӧдйӧджык кула...

<>

• * *

А ме ӧтнам тулыс дорас веськодь, Сынӧд кӧрсьыс сьӧлӧмӧй оз чеччы, Шоръяс, гаръяс уськӧдчӧны честьӧ Асывводзсянь весьшӧрӧ. Ме сетчи Олӧмыслӧн вемӧсыслы. Важӧн Кодкӧ бӧрся довга и ог юась. Тулысыс ни синваӧн, ни вашӧн Морӧс пытшкын садьтӧгыс оз луась...

<>

• * *

Коркӧ, вывті-вывті важӧн, Сё во сайын Ок и ылӧдлывлі вашӧн Да пӧсь тшайӧн Пырысь гӧстьӧс, Петліс бӧрсӧ Сы ни садьӧн, Корасьны дзик пыр и воліс Пыжӧн-даддьӧн. Уна зонмӧс керліс Мугӧм рӧма синмӧй. Муслун дойыс сэки Некодлӧн эз инмыв. Тэнӧ думысь корси гусьӧн Быд пӧсь кылысь, Аддзи эськӧ. Да ӧд Он нин томмы Выльысь...

<>

• * *

Тэ эн и пырав, а ме виччыси, Кузь рытыс ӧдва пӧрис войӧ. Кык вир чут мыччысисны сойын, Эг горӧд да. Ме тӧда: вунан! Гоз-мӧд тӧв нӧшта. Ме тӧда! Мыйла бара-й тӧда, Ӧд кыдзи тэтӧг овны мӧда, Ог гӧгӧрво...

<>

• * *

Тэнӧ ме ог дивит ньӧти. Тайӧ ӧти. Мырдӧн радейтчӧм он пык. Тайӧ кык. «Тӧвлы - вӧля!» - коркӧ шулін. Тайӧ куим. Гӧгӧрвотӧмӧн эг коль. Тайӧ нёль. Ме дорӧ тэ вӧлін кид. Тайӧ вит. Тэнсьыд муслунтӧ ог пайк. Тайӧ квайт. Кадыс лӧньӧдӧ быд висьӧм. Тайӧ сизим. Кӧкъямысӧднас и лои, Мыйысь полі. Ӧкмысӧдсьыс мыйкӧ водзӧ Овлӧ шоча...

<>

• * *

Петук кампетлӧн вижиник сирыс Ляксяс соскӧ да сэтчӧ и коляс, Медым муртсаник юммӧдны вирӧс Тайӧ дубалӧм Выльвося вояс. И кор йӧктыны ме тэнӧ кора Сійӧ чуньясӧс топӧдлас гусьӧн. Мый кӧть асъядор тэ меысь оран, Гашкӧ, сир сорыс сьӧлӧмад уся...

<>

• * *

Тувсовъя кодзулӧн Ӧзйӧны синъясыд, Кӧтасьӧм пышкайӧн Тіралӧ сьӧлӧмыд. Лолышттӧг восьлалан Радейтчӧм пӧлӧныс. Кодлӧн нӧ чуньясыс Чуньясад инмасны? Воськов да мӧд да, Пыр вылӧ и вылӧджык. Усян ли, кутчысян, Юрыд кор бергӧдчас? Кодлӧн нӧ нюмыс сэн Мый вынсьыс дзерӧдчӧ, Код водзын ыпмунін тэ Юрси йылӧдзыд...

<>

• * *

г. Мортыд ловъя сэтчӧдз, Кытчӧдз мортсӧ казьтылан, Кытчӧдз нюмӧн вошйӧдан Сійӧс пӧсь нянь дорад. Кытчӧдз гажтӧмыдла Синмыд гусьӧн вазьылас, Дыр-ӧ сысянь отсӧг Кевмысигад коран...

<>

• * *

«Я снова был белкой, со мной произошло очередное превращение». А. Ким *Белка* Сыктывкарын кералӧны пуяс. Сулалӧны пуяс - ки ни юр. Менам ёртӧй вӧлі рыжӧй ур, Ӧти войӧ сійӧс сьӧд пон пурис. Кодзув пӧвстын ӧні сылӧн лолыс, Да оз тыдав некысь рыжӧй чут. Паськаліс, дерт, ёна енэж луд, Сӧмын потшъяс весьтад кельыд лоис...

<>

• * *

Сы мында серавлі да бӧрдлі, Но серам-бӧрдӧмлысь Збыльвывса кӧрсӧ Тӧдмалі сӧмын тэкӧд...

<>

• * *

Арыс мекӧд вашкӧдчӧ Посни кӧдзыд зэрӧн. Морӧс шӧрӧ лажгӧдчис, Дурӧ чегӧм перӧӧн. Джодж тыр — чашйӧм кабала, Мамӧй вежон ломтас. Быттьӧ думысь сарала Енлӧн индӧм сёрдас...

<>

• * *

Ичӧтдырйи бӧрдлі, Пидзӧсӧс гирскывлі да, Кор чуньӧ жель пыравліс. Чайтлі, таысь дойманаджыкыс оз овлы. Ӧні бӧрда, Сьӧлӧмӧс гирскывла да, Лолӧй желлясьлӧ кор. Чайта, таысь дойманаджыкыс оз овлы. А дойӧй мекӧд быдмӧ...

<>

• * *

Эз некод велӧд пернапасӧс чӧвтны, И йӧз мозаыс кевмысьны ог куж, Но таысь, тӧда, ас дорсьыд он вӧтлы, А гусьӧникӧн дивитыштан куш. Ог грекъяс вештӧм вылӧ надеяӧн эскы,— Ни ӧти грекысь каитчӧм ог кыв. Мем Тэтӧг лои вӧльнӧй светас дзескыд, Дай видзӧдлыны кӧсъя енэж выв...

<>

• * *

Сет, мем, чужан муӧй, лача, Мый ме тэнӧ садьӧн аддза, Сет терпенньӧ, чужан кылӧй, Нюмӧн кывзыны роч сьылӧм. Юксьышт, мамук, мекӧд выннад, Быри эбӧс водзӧ сынны. Енмӧй, Енмӧй, сетышт эскӧм, Лолӧй инасяс мед эськӧ...

<>

• * *

Лидия Логиновалы, менам медрадейтана СЬЫЛЫСЬЛЫ Коркӧ гӧлӧс кӧрсьыд пӧтла-ӧ... Морӧс пытшкын выйӧн гӧвкъялӧ, Маа дойӧн лолӧс сьылӧдӧ. Быттьӧ кувла, тэнӧ кыла да. Дзикӧдз кувла, райӧ веськавла, Пушыд руас пӧттӧдз пессьывла. Ӧдвасорӧн бӧрсӧ пальӧдча, Тэнад йӧлӧгаын янӧдча...

<>

• * *

С.К. Волас мисьтӧм кымӧрыс Да и мунас бӧр. Мед кӧ дойӧн тырӧма Ловлӧн ичӧт йӧр. Чужъя джуджыд потшӧсӧ - Пасьмунас зиль-зёль. Босьтін кӧ тэ водзӧстӧ, Уджйӧза эг коль...

<>

• * *

Вои гортӧ, Слабог, Вои гортӧ. Мамук, паныд котӧрӧн, вай, пет. Чайта, лои олӧмас ме Мортӧн. Мед эг ло кӧ Ыджыд чина мортӧн, Но эг ло и, мамук, Сэтшӧм мортӧн, Тэныд меысь Яндзим вӧлі мед...

<>

• * *

Пуксьылам, вай, мамукӧй,

Вочаныр. Висьтасьтӧмсьыс сьӧлӧмӧй Дзик нин тыр. Карӧй лэдзлӧ тэ ордӧ Бӧра водз. Рӧдасьӧмным овлывлӧ Шочсьыс-шоч. Мыйта вермам, нюжӧдам Рытсӧ, вай. Тэнад шоныд дориыд Быттьӧ рай. А кор бара торъялам, Тэ эн бӧрд. Пернапастӧ ме весьтӧ Гусьӧн чӧвт...

<>

• * *

Зэрис лунтыр, Зэрис войбыд, Сэсся бара Лун да вой. Тайӧ меным зэрыс мойдіс Ассьыс медся мича мойд... Москвалы Тэнад кӧдзыдӧ сідз ог и велав, Мый кӧть Войвылысь волывла татчӧ. Ӧти нюм на эн доровтлы мелань. Тӧдтӧм йӧз пӧвстас ӧтнамӧн варчча. Тэныд, бурак, эг шогмы. Он кӧсйы, Менӧ тэ дінын мыйкӧ мед кутіс. Горза: «Веськодь!»... А чужӧмӧй ӧзйӧ, Кыдзи поездлӧн бӧръя гӧрд чутыс... Эн бӧрд. Ме тэныд сьыла сьыланкыв, Кутшӧмӧс коркӧ сьывліс мамӧй, И лолыд лоас ме кодь рамӧн. Эн бӧрд. Ме тэныд сьыла сьыланкыв. Эн бӧрд. Ме тэныд мойда уна мойд, И ставныс помасясны бура. Тадз мамӧй менсьым сьӧлӧм вурліс. Эн бӧрд. Ме тэныд мойда уна мойд. Эн бӧрд. Ме тэнсьыд малалышта юр, Ас бердӧ топӧдӧмӧн шонта. И мам моз вашкӧдышта: «Помтӧм Му вылас олӧмыс». Эн бӧрд...

<>

• * *

Винласа ань Лидия Александровна Терентьевалы Вои, мамук, вои, Синватӧ, вай, чышкы. Дзоньвидза ӧд, ловъя, Став вӧлӧкыс мышкын. Небыд пельпом вылад Шойччӧдышта юрӧс. Сьӧлӧмъясын, кылан, Ӧтмоз вирным тюрӧ. Тэнад вояс пӧсяд Меным шогӧс сотны. Сэтшӧм, мамук, лӧсьыд Вӧльнӧй светас овныс...

<>

• * *

Ме тэрмася сэтчӧ, Кытчӧ важӧн нин сёрми, Кӧні ме йылысь некод Оз заводит сёрни. Кӧні бурӧн ни, лёкӧн ни Менӧ оз казьтыв Меӧн чабравлӧм румка, Меӧн гирскывлӧм тасьті. Бӧрсянь яндзимӧй вӧтчӧ, Сӧмын суны оз вермы. Зэрӧн малалысь шева Кувтӧдз вермӧма керны. Тӧда, ӧдзӧс оз восьтыны, Пырны оз корны, Да ӧд быдӧнлы аслыс Ассьыс олӧмсӧ овны...

<>

• * *

Тэ локтін войнас Дзикӧдз кӧтасьӧм, Зэв гусьӧникӧн Меӧ вӧзйысин. Тіралін кынмӧмсьыс Да полӧмсьыс. Чайтін, мый важӧн Колин олӧмсьыс. Чайтін, мый тадзи Оз нин корасьны. Тэ мыкталін, Быд кывйын сорасьлін. Ме чӧв олі Да помся бергалі, И мекӧд кывтіс Крӧвать-керкаӧй. Дзик асъядорыс Муртса ойбыртлі Ме тэнад юмов вира Сойбордад. И коймӧд лун нин Шудӧн сырма, Мый менам, Менам лоин, Кывбур...

<>

• * *

Ыджыд мамлы, кодӧс ме эг тӧдлы Тэнад морӧс бердӧ некор ме эг топавлы, Нигӧн юрситорӧс некор тэ эн малавлы, Юр пыдӧсӧс вомидзысь эн солавлы, Песла лои котравтӧм тэд, вала и. Ӧшинь улад тэ пыдди ме волывла, Мый кӧть йӧз томанӧн игналӧма кильчӧтӧ. Тӧда: медся шудаӧн сэк лолывлан, Кор тэ менам синмӧн гӧгӧр видзӧдан...

<>

• * *

Шондӧдлас, А сэсся выльысь ыркнитас. Челядясьӧ август спасъяс шӧрас. Регыд сылысь кага русӧ пыркӧдас Скӧр сентябрьлӧн баддьысь перйӧм ньӧрыс...

<>

• * *

Тэ, рака, ме весьтын эн кравзы, Ме ачым аслым прамӧй тун. И лоас мый, ме тӧда ставсӧ. Кӧть вунӧдан, да оз тай вун. Тэ менсьым олӧмӧс эн вӧрӧд, Ме ог жӧ пузувт тэнсьыд поз. Вай, бурджык лэбам еджыд вӧрӧ Да корсям шудлысь пужъя роз...

<>

• * *

Сӧмын на воин, А котӧрӧн мунан нин бӧр. Мыйкӧ тай лоин, Некытчӧ лолыд оз тӧр. То тані, то сэні Пӧсь кок шыыд пальӧдӧ ун. Кӧть веськодь тэ меным, Но мыйлакӧ некыдз он вун...

<>

• * *

Эн эскы, эн пов и эн кор, Мый лоана, лоас ас кадӧ. Оз водзджык, оз неуна сёр, Оз дзугсьӧмӧн - ладӧн-ладӧн. Эскытӧм, дзайгысьтӧм, збой, Ов, кыдзи овсьӧ. И мед жӧ Оз топӧдлы каитчан дой, Кор нинӧм он вермы вежны...

<>

• * *

Ме сідзи и тӧді, Ме сідзи и тӧді, Мый мунан да Юӧртор весиг он мӧдӧд. Ни кӧні да кодкӧд, Ни кодкӧд да кыдзи. Кӧтасьӧм сьӧлӧмӧс Кабыр оз пыдзырт. Кадыс, дерт, пӧдтас (пыр на тадз лолӧма), Да кодарсӧ водзджык: Дойӧс ли олӧмӧс...

<>

• * *

Гижтӧм, звӧниттӧм, пыравтӧм. Ставыс Тай нӧ «тӧмъясысь» артмыны кутіс. Кытчӧ кылӧдӧ визула ваыс?! Коркӧ пысасьны усьлас-ӧ шудыс?! Баддя йӧр костӧ вошӧны ёртъяс, Джуджыд кыр йылӧ саялӧ муслун. Регыд сьӧлӧмӧй дойяссьыс потас. Оз кӧ - велалас надзӧник кусны...

<>

• * *

Тэнад карын век на гожӧм, Менам карын — важӧн тӧв. Тэ он эскы, и ме ог жӧ, Миян костын мый эз вӧв Некор — вемӧсӧн ни вӧтӧн Нинӧм. Мый эз вичмы войт Казьтылана ӧта-мӧдлы. Лоанаыс мый оз дойд...

<>

• * *

Ӧдва-й эштіс тайӧ войыс, Чайті, кула помтӧм сьӧдас. Кодкӧ аддзас кынмӧм шойӧс, Шуас, ме пӧ тайӧс тӧда: Кывбур гижысьӧн пӧ вӧлі, Коми нывка, Анжелика. Сэсся копыртчылас чӧла - Со пӧ, воӧма дзик пикӧ... Слабог, ловйӧн на тай коли. Бӧрдӧм шыӧс йӧла летӧ. Кыдзкӧ верми жӧ ӧд, колли Войсӧ медводдзаысь тэтӧг...

<>

• * *

Кыдзи метӧг олін-вылін? Мыйысь бӧрдлін, мыйысь сьывлін? Кодкӧд лун да войсӧ коллин? Мыйкӧ меным видзин? Колин? Эг пыр дивитны ли видны. Талань волі, со и видлі. Гашкӧ, сӧмын здук-мӧд шойчча, Гашкӧ, асылӧдзыс кольчча...

<>

• * *

Ме кута тэысь гажтӧмтчыны. Позьӧ?.. Ме тайӧ гажтӧмлунсӧ Дзеба морӧс пытшкӧ. Ни ӧти морт оз казяв, Ни оз повзьӧд. Сэн важӧн нин эз Та выйӧдзсӧ бытшкыв. Ме кута гажтӧмтчыны гусьӧн, Ылын-ылын. И та кындзи мем сэсся Ставыс ковтӧм. Тэ меным лоин мамӧн, Чойӧн, нылӧн. И, сідзкӧ, кӧнкӧ эм И менам гортӧй...

<>

• * *

Тэ паныдась виж дзоридзьяса нывлы, Ӧд тэнӧ сійӧ асывсяньыс корсьӧ, Кӧть прамӧя и ачыс оз тӧд, мыйла... Но быттьӧ кодкӧ мырдӧн вӧтліс гортсьыс Да тшӧктіс сылы веськӧдчыны тэлань. Мӧд туйӧ кежӧмӧн тэ нывкасӧ эн повзьӧд...

<>

• * *

Ме бара восьта ассьым сьӧлӧмӧс, И вошлӧм ключыс кыськӧ сюрис. Сім дзиръяс ловзялӧны-вӧрӧны. Дрӧгнитӧ-ышловзьӧ быд вурыс. Эн крукась джуджыд порог вомӧныс Тэ пыригад, виччысьтӧм гӧсьтӧй. И мед оз повзьӧд сэтчӧс полӧмыс, Ӧдйӧджык гуся бисӧ ӧзты... л. Сійӧ радейтӧ дона чай Да донтӧм куритчан. Сійӧ асылӧдзыс Шӧйтӧ-вошласьӧ Интернетын. Сыкӧд паныдасьтӧдз Ме эг чайт, Мый кувтӧдз эськӧ мучитчи, Лои кӧ кодӧнкӧ мӧдӧн, а эг поэтӧн. Сійӧ шуис мем: «Тэ эн пов. Ов, кыдзи окота. Ов, кутшӧм эм, асьтӧ нинӧмла мырдӧн вежны». И ме бӧрді, Ӧд сы мында во код тӧдас, Мый вылӧ лоті да. А коліс прӧста Тэ дінӧ сэки кежны... Тэрыб таксиын матыстчӧ асыв, Торйӧдны мед. Сёрмысьяс вылӧ сійӧ зэв азым,- Жальыс оз пет. Асьным, дерт, корим, звӧнитім: Комын сизим звӧнок. Тэ - чатрасин гӧгӧр, ме — кевмыси помӧдз, Мед тэла эз лок... Ме гажтӧмтча тэысь, Тэ - ӧдва кӧ Гажтӧмтчан меысь. Миян костын кӧть костыс И ӦТКОДЬ - воськовттӧм, дзонь. Сӧмын тэ дінӧдз месянь Ловзьӧ да гӧрддзасьӧ пелысь. Ме дінӧдз тэсянь Кын пелысьсӧ кокалӧ жонь...

<>

• * *

Мый эськӧ лоис сэк, неуна мӧд нога лоис кӧ? Тадзи жӧ бергаліс муыс мӧй, тадзи жӧ шонтіс?! Татшӧм жӧ вӧтъяс мӧй шлывгисны ичӧтик вонті Да чӧскыда кургисны-сьылісны кодзула войыскӧд?! Муртса кӧ мӧд нога... Тані жӧ... Ӧні жӧ... Тэкӧд жӧ... Пола и мӧвпыштныс, другысь да мӧвпъясӧн вомдзассяс... Сывйышта тэнӧ да кыпӧда югыдлӧз енэжӧ, Сэтчӧ мед овмӧдчас мойдным, кор му вылас помасяс...

<>

• * *

Ме чайті, быдсямасӧ тӧдлі, Мый колӧ и мый оз. Тӧдмавлі нӧдкывъяс да нӧдлі, Чуманӧ ӧтгудырӧн лӧдлі Курыд и юмов роз. Дзик нинӧм некысь эг нин виччысь, Дзик нинӧм нин эг кор. Сы вӧсна ньӧти эг и видзчысь Тэ менам эндӧм олӧм виддзӧ, Юркытша петін кор...

<>

• * *

Козьнав меным ӧти вой, Кодзувтӧмсӧ, кузьсӧ. Дзикӧдз пикӧ воштысь дой Пемыдас мед усьлӧ. Эн мем жалит сійӧс, эн, Лок, да бокӧ водлы! Тэнад сэтшӧм войыс эм. Кодлы видзан, кодлы...

<>

• * *

Ставыс лоас сідзи, кыдзи кӧсъян. Пӧльыштӧмнад кусӧдан ли ӧзтан, Сэсся тыртыштан ли, лӧдсалан ли. Бӧрйы. Тэнад муса милӧсьтӧ ме вӧйи...

<>

• * *

Гӧлӧс быртӧдз сьывлывлі, А тэ эн и кывлы. Сы мыйтаысь ылавлі, Тэныд эг и туй. Олӧм бокті ветлӧдлін, Юрыд вылын-вылын. Кок улад эн видзӧдлы, Кӧні куйлі шуй...

<>

• * *

в. Ме олӧмас кыктор и кужа: Гижны кывбур Да радейтны тэнӧ... Кыдз нӧ эськӧ менам ӧнӧдз Тэтӧг овсьӧма?! Да и позьӧ нӧ мӧй шуны Сійӧс «олӧмӧн», Корли муртса на со лэптін мусьыс. Ловзьӧдін. Корли муртса на со лои тэныд Колана. Муса кывъяс, тӧда, весьшӧрӧ Тэд шуала,- Налӧн кӧрныс дольӧмысла важӧн Пагаліс. Быттьӧ ӧбраз водзын, Пидзӧс вылын сулала. А тэ синва шорӧс чышкан, Быттьӧ кагалысь...

<>

• * *

Ме тэӧн вися, Кувмӧн вися. То пӧсьӧн коялӧ, то йизя. То серала, то бӧрда-ойза. То лелькуйта, то чашъя дойсӧ. Ме тайӧ висьӧмнас и кольчча, Мед сэрапомӧдз коркӧ сотчас Йӧй сьӧлӧм. Тэныд ковтӧм сьӧлӧм. Мед менам муслун лоас - сӧрӧм...

<>

• * *

Гӧгӧр тэ. Синмӧс восьта ли куня, Кыла - инмӧдчан чуньнад Менам вом дорӧ. Сӧмын тэ. Тӧдтӧм зэрын ли лымйын Сьӧлӧмыд некор оз кынмы Шоныд моздорын...

<>

• * *

Вевттьы менӧ. Вевттьы тӧвсьыс, Вевттьы шогсьыс, пемыд чӧвсьыс. Вевттьы, кодзув менам асъя, Тайӧ войсьыс... Вевттьы аснад...

<>

• * *

Кывъяс... Кывъяс... Кывъяс... Тыраӧсь да кушӧсь. Чорыдӧсь да рушӧсь. Юмовӧсь да дубӧсь. Кывъяс... Кывъяс... Кывъяс... Тэа-меа костын Эз и лоны поскӧн. Эз и пӧрны шудӧ...

<>

• * *

Вӧлім ми. А лоим тэ да ме. Киссьӧм ватӧ бӧрсӧ он нин курав. Сьӧлӧм пыдди - вирӧн ойдӧм гуран. Бура кольны... Бура... Бура... Бура... Ме пыдди тшӧтш олышт ӧти нэм...

<>

• * *

Эськӧ морӧсӧс чашнитны- восьтыны, Пессьысь лолӧй мед жбырнитас лэбачӧн Сэтчӧ, кӧні пӧсь енэжыс востыма. Аслас олӧмӧн овны мед велӧдчӧ...

<>

• * *

Гортӧ! Гортӧ! Мамук ордӧ! Кыддза йӧрӧ, Кӧвдум кӧрӧ! Дзуртысь джоджӧ Ӧбраз водзӧ...

<>

• * *

Сьӧктаммӧмаӧсь кольясӧн козъяс. Мамӧй шуӧ: «Виччысь кӧдзыд тӧв». Меным нимкодь: Сідзкӧ, войяснас тэ ме дорӧ Ёнджыка кутан топӧдчывны...

<>

• * *

Узьӧ платтьӧ улӧс помын, Узьӧ тяпи крӧвать дорын, Узьӧ кӧрӧб пытшкын чачӧ, Узьӧ юрлӧс улын нёнь. Енэж вывсянь, кымӧр вомӧн, Вӧсни унъяс мед эз орны, Мича вӧтъяс койӧ надзӧн Налы еджыд бордъя зон...

<>

• * *

Ыджыд мортлы бӧрдны пӧ оз позь. Сӧмын некыдз кутчысьны ог вермы - Сьӧлӧм вылын ставыс гӧгӧр розь: Зэрны! Зэрны! Зэрны! Зэрны! Зэрны! Ӧшинь сайын быгалӧма сер Шлявгӧмысла. Бергӧдчы да видзӧд. Гожӧм чӧжӧн пӧрысьмыштӧм зэр Збыльвылас кӧ, ме кодь жӧ на ичӧт...

<>

• * *

Арыс КОЛИС ВОТЧЫТӦМӦН - Тшак ни чӧд. Лэбӧдлывліс расъяс пӧлӧн Дженьыд вӧт. Шуи-крапки: «Мӧд во вола, Аддза ин!» Сӧмын оз нин сывдыв тола Чужанін...

<>

• * *

Войвывса гожӧмыд Соддзад и тӧрыштӧ... Кватитан кабырад,— Неуна вӧрыштас, Неуна пӧсявлас, Кӧдзавлас, Гымыштас. Сэсся и тӧдлытӧг Лым чир моз сылыштас... Кылан, кыдзи лолӧй сылӧ, Кылан? Кылан, кыдзи сійӧ петӧ Ывлаӧ? Кылан, кыдзи кусынь бордсӧ Веськӧдӧ? Кӧсйӧ тэлань воӧдчыны Эськӧ да. Ог тӧд, бара-й, Эбӧс-лолыс тырмас-ӧ Шымыртыштны Татшӧм ылі ылнасӧ. Ӧлӧдны ог вермы Ыззьӧм лолӧс. Енмыс кыдзи шуас, Сідз и лоас...

<>

• * *

Регыд, регыд нин суӧдас тулысыс Варччӧм чужӧма, кынмалӧм тӧвсӧ. Регыд, регыд нин пась кепысь вурысыс Сылӧн ротмунас ульсалӧм кӧрсьыс. Сэні сэсся и гожӧмсӧ чуньыштны Гашкӧ, бара на Енукыс сетас... Тӧрыт тэ йылысь эг на куж думыштны, Талун тэланьӧ кок туйӧс лета... В. Уна Енмыслысь ог кор, Ставыс тӧрас ӧти соддзӧ: Мед тэ мекӧд вӧлін орччӧн, Унмовся и садьма кор...

<>

• * *

Мед сьӧлӧм улялӧ и лойсьӧ,

Мед син куньны оз сет. Мед лолӧй быгалӧм да бонзьӧм, Мед палявлытӧм. Мед. Ме ачым тайӧ шудсӧ корси, Эг мукӧдыслысь пайк. Мед вирӧй бӧрдӧмысла совзьӧ, Мед татшӧм муслун пай...

<>

• * *

Быд туйлӧн эм панас и пом. Став кок туйным лыддьӧма наын. Но ыджыд-ӧ воськовлӧн дон, Тэ тӧдмалан адын ли райын...

<>

• * *

Коми войтырлы Коркӧ ӧд и миянӧдз гожӧм кӧрыс воас. Косаӧн да вилаӧн петам Эжва дорас. Лысва нюмӧн небзьӧдам неджӧгасьӧм сьӧлӧм, Кыӧм шогӧс резьӧдам, ӧвтам видзьяс пӧлӧн. Чӧсмӧдыштам вирнымӧс Чужан мулӧн горнас. Коркӧ ӧд и миянӧдз гожӧм кӧрыс воас...

<>

• * *

Вемӧсӧн ли вӧтӧн ставыс вӧлі,

Ачым аслым висьтавны ог куж. Морӧс пытшкын ланьтӧдчӧма сьӧлӧм Тырсьыс тыр, а, гашкӧ, кушсьыс куш. Воліс да со асъя руӧн сыліс. Гӧгӧрвотӧмас кӧть сэсся пӧд. Сійӧ сьӧд юрсиа мича нылыс, Кӧнкӧ, ме моз нинӧм жӧ оз тӧд...

<>

• * *

Чуксасьӧны дзодзӧгъяс Кушмӧм нюръяс весьтын. Шлывгӧ олӧм водзӧ да Мекӧд на мед эськӧ. Гоз-мӧд кывбур коли на Вӧчыштӧм, но чужттӧм, Медым тэнсьыд кольмӧдны Вылӧ лэптӧм юртӧ...

<>

• * *

Ставыс сылас: и лымйыс, и йиыс. Ставыс сылас, но бӧрдны оз ков. Шевкнит енэжас шоналӧм кияс, Чышкы синватӧ, вашнит да ов...

<>

• * *

А.Ельцовалы Помнитан, Алёна, Москватӧ кыдз «босьтім», Кымын сьӧлӧмкылӧм сылы войӧ восьтім, Кымын кывбур лыддим, кӧть и коми вылын. Кыдзи сійӧ кывзіс: нырыс юрсьыс вылын. Кӧсйим лоны асӧн: повтӧмӧсь да пелькӧсь, Мыйта тэа-меа летім сылысь пельӧс! Бордъяснымӧс бертліс, эськӧ, ок, и ёна, Сӧмын ми эг сетчӧй. Помнитан, Алёна... Сэтшӧм вылӧ, сэтшӧм вылӧ кайи-лэбзи. Сэтшӧм вылӧ, сэтшӧм вылӧ, воши пем. Синва-зэрнад чорыд мусӧ, кора, небзьӧд, Бӧрдӧм сорӧн енэж шудсӧ кевмы мем. Коркӧ, вильда кӧ да кутчысьны ог вермы, Еджыд бордӧй буретш сьӧрысь кӧ оз ло, Небзьӧм муас усяс вушйӧм эзысь перна Выльысь чужтны менсьым инасьлытӧм ло...

<>

• * *

Зэрыс помся сьӧд визя.

Менам мусаӧй висьӧ. А ме лӧньӧдны дойсӧ Ог вермышт. Кывбур грӧш джын оз сулав. Ачым бӧрдӧмла кула. Тӧдса-тӧдтӧмӧй, кылан кӧ, Кевмышт!... Менам мусаӧй висьӧ...

<>

• * *

Талун, зэрӧй, ме тэкӧд ог бӧрд, Талун, зэрӧй, ме нюмъяла. Видзӧд! Мед кӧ шудӧй зэв вӧсни да ичӧт, Но ӧд ловъя, а абу нин вӧт. Со и та вӧсна, зэрӧй, тэ пӧсь, Со и та вӧсна, зэрӧй, тэ юмов! Юав, зэрӧй, вай, ӧдйӧджык юав, Кутшӧм ме ордын пукалӧ гӧсьт...

<>

• * *

А ме таляла гылалӧм коръяс, А ме гажтӧмтча медводдза лымйысь. Мед кӧть ачым и кынмыссьыс кынмысь, Да толаас бӧрдлывлі кымынысь, Да кымынысь ловшыӧй орліс. А ме таляла арыслысь дойсӧ, А ме лӧсьӧдча тӧлыслӧн (мыйӧ?). Гашкӧ, сибала кодлӧнкӧ сывйӧ — Сійӧ «кодкӧыс» важӧн нин кыйӧдӧ Да ошкӧ дзик кодзувтӧм войсӧ... Гылалам, гылалам, гылалам Коръясӧн, лымчирӧн, кодзулӧн. Шыясным ӧдва кылана — Вына вомдзалӧм. Надейтчам, надейтчам, надейтчам Кодлыкӧ пельпомас инмыны. Усям да пальӧдчам, пальӧдчам, Мед выль пӧв видлыны...

<>

• * *

Каръяс вылӧ сиктъяснымӧс

вежим. Пӧль-пӧч ордым вылысь нешыштчӧмӧн кежим Корсьны кокньыдсӧ да, лӧсьыдсӧ да, бурсӧ. Видзны кыйтӧм шудлысь еджыд кусӧ. Мам керкаяс вузалім да-й, майбыр, Оз нин сюрлы сэсся нокыс йӧрын-градйын! Мудзим копрасьнытӧ, дышъяс, чужан мулы! Кытчӧ, бара-й, дзебасны, кор кулам...

<>

• * *

Енэж чарӧмӧд носки кежысь. Кыткӧ вежалысь, кыткӧ вежысь. Ичӧтдырся кодь пельк да кокни, Еджыд туйыслы пом ни, дор ни. Шонді шоныдыс, тӧлысь йирмӧгыс, Чужӧм варччӧма, гӧлӧс чирӧма. Юртӧ чатӧртлы, эн пов усьӧмысь,- Тэнсьыд муслунтӧ кытчӧдз нусьӧма...

<>

• * *

Асывсяньыс зэрӧй, воча чойӧй, Тулыс няйтсӧ кок чуньяснас лойӧ. Менӧ эськӧ думсьыс кыскӧ-корӧ Ас дорас да мугӧм гуран дорӧ. Лок пӧ петав, кыкнад пӧ ӧд гажа, Вунас удж и майшасьӧм, и пажун. Кыйӧдча ме гусьӧн ӧшинь сайсянь, - Меным оз позь, ме ӧд ӧні карса...

<>

• * *

Меным водз на казьтылӧмъяс гижны - Зумыд кывйыд меным оз на сюр. Ме со неважӧн на дугді гыжӧс йирны, Сідзкӧ, водзын менам маникюр. Сідзкӧ, водзын премия да орден, Водзын ыджыд слава да почёт... Ме автобусӧн на кайла гортӧ, И оз яндысь меысь важся ёрт. Кутшӧм лӧсьыд, ставыс на кор водзын, Кор на кужан петкӧдлыны веж. Му шарыс кор буретш тӧрӧ соддзад, И дзик нинӧм вылӧ сійӧс тэ он веж...

<>

• * *

Менам талун бара на оз узьсьы, Кольмӧдӧны юрӧс помтӧм мӧвпъяс. Ӧшинь сайын надзӧникӧн усьӧ, Гашкӧ, лым, а, гашкӧ, небыд вӧтъяс. Киняулад куткыртчышта гусьӧн, Лолалӧмад лолалӧмӧн ладма. Мед сэн лымйыс вӧтъяс сорыс усьӧ. Сӧмын тэ мед, донаӧй, он садьмы...

<>

• * *

Лолӧй туӧ Эжва юӧн - Гудрасьӧма вемӧс-вӧт. Сунышт. Кытчӧ кӧсъян, нуа, Сӧмын визулас эн пӧд...

<>

• * *

Кӧсъян кӧть он сэсся, чужӧмад беринъяс коя. Ки пыдӧс сӧнӧдыд кая да сьӧлӧмтӧ лоя. Некытчӧ меысь тэ, ныланӧй, ӧні он воштысь. Пасьтав выль платтьӧтӧ, шыльӧдчы, кильчӧтӧ восьты...

<>

• * *

Сиктӧй дзикӧдзсӧ эз лэдз, Карӧй тырвыйӧ эз сибӧд. Ачым аслым - лэчсьыс лэч,- Сорласьӧма шогыс виркӧд. Лолӧй шыбитчӧ быд вой Вывланьӧ, но дзик пыр усьӧ. Сылӧн вӧсни еджыд сой Вывті сьӧкталӧма буссьыс...

<>

• * *

Мам... Ме бара звӧнитны эг лысьт. Ме тэнад гӧлӧс кӧрысь повзи. Ӧд сійӧ та дыранад совзис, А бӧрсӧ юммӧднысӧ кысь... Мам... Ме бара тэ дінӧ эг лок, Кӧть эськӧ кӧсйи. Збыльысь кӧсйи. Ме тӧда - тэныд вывті шог, Ме ачым тайӧ шогсӧ вӧзйи. Мам... Тэ менӧ нинӧмысь он вид. А бурджык эськӧ медым видін, Мед элясьӧмнад дойтӧ сывдін, Эн гусьӧн сьӧлӧм боктӧ нирт. Мам... Ме коркӧ ачым лоа мам. Ме тэ моз коркӧ нывлӧн вуна Да тэ моз ӧткалунӧ суна, Ӧд сылӧн ме моз оз ло сям...

<>

• * *

Баб керкаын горт олӧны шы ни тӧв да бус. Абу найӧс шызьӧдысьыс. Абу. Пельпомъясыс сьӧкыдысла сунгысисны нюз. Лигышмуніс кильчӧ послӧн кабыр. Чунгӧм лӧньсьыс пельтӧммисны пӧтӧлӧк да джодж, Турдӧмысла потласисны пачьяс. Синтӧм ӧшиньясӧ тувъялӧма куим креста потш, Шонді югӧр на весьтӧ оз качлы. Баб керкаӧс шойччӧдӧны, кӧть эськӧ эз мудз,- Быдтысис на эськӧ помтӧг-дортӧг. Сӧмын венласьнысӧ олӧмыскӧд эбӧсыс эз судз. Со и лэбалӧны йылӧмъясыс позтӧг...

• * *

Гортӧ кайлігӧн Паныдасьысь челядьыс тӧдтӧмӧсь. А водзті вӧлі нимнас шуа Быд шӧйтысь понйӧс...

<>

• * *

Вашкӧдчӧ войыскӧд, Сьӧд синма чойыскӧд Кывбур. Сёрнилӧн сунисыс Енэжлӧн туйясӧ Шлывгӧ. Кодзула ольӧдыс Йӧлаыс колльӧдӧ Шыяс Корсяна-аддзытӧм, Эскана-лачатӧм Тыас...

<>

• * *

Пыр тай ылысмӧ гортланьӧ туйӧй, Кӧть и важ кодьӧн кузьтаыс кольӧ. Кӧть и важ дорсьыс шыльыд да мольыд,- Няйтсӧ песӧмысь кокыд оз жуяв. Эськӧ вой улад тюрлыны дыр-ӧ, Ӧшинь воргаысь чышкыштны войтъяс, Ониш паччӧрлысь кывзыштны мойдъяс?! Кыткӧ сьӧлӧмӧй кырӧ и кырӧ...

<>

• * *

Ӧти чуньлы — вира пас, Орччаыслы — чунькытш. Быдтор места вылас ас, Сӧмын кодлы бурджык. Ӧти килы — киасьны, Мӧдлы — шыпурт кутны. Кӧсйӧмъясным инасны, Сӧмын кутшӧм шудлы. Ӧти ОЛӦМ — йӧзыслы, Мӧдсӧ — пӧшти аслыд. Бӧрас йиджас вӧлисти, Сӧмын коді радлас...

<>

• * *

Мусӧ кок пыдӧсӧн бергӧдлам Енэж бердӧдыс. Коді ӧтвесьт, коді паныда, Бӧрдӧм-радным да. Кыткӧ сьӧкыд, кыткӧ личавлӧ, Няйтчӧ-мичаммӧ. Овлӧ яра, овлӧ повзьӧмӧн. Кулӧм-ловзьӧмӧн...

<>

• * *

Ми петам «Август» остановкаӧ. Ми корсям татшӧмсӧ да аддзам. Мед мартся турӧб корсьӧ-омлялӧ Миянӧс ломтывлытӧм пачын. Ми кисьмим! Со ӧд, кыдзи овлывлӧ! Ми кисьмим толаас да пужъяс! Кӧсйӧмным сьӧлӧмъясӧс тойлалӧ, - Он тӧдлы, орӧдас став вужнас! Тан садьтӧг пӧрччам кӧлуй-кӧмӧс, Да вошам вижа-гӧрда рӧмас...

<>

• * *

Кор кык сьӧлӧм клёнгӧ Ӧта-мӧд пытшкас, Сэки Му шар пасьталаыс некутшӧм часі оз кыв...

<>

• * *

Асъя зэрыд, шуласны, гӧсьт Тэ менам асъя зэр, Тэ олӧмас он кольччы. Ни зэлляӧй эз кер, Ни синъясысь эн коддзы. Кок туйтӧ нюлас лун, И быттьӧ эн и волы. Мун, асъя зэрӧй, мун, Ме тэтӧг шуда лоа...

<>

• * *

Тӧлыс коз пу улӧ йӧжгыльтчӧма, Кыйӧдӧ: Дыр-ӧ тулыслӧн оз мыччысь Шонді-юркытшыс. Кӧсйӧ гусьӧникӧн Уськӧдчыны мышсяньыс, Медым пӧттӧдз нывсӧ Тола пиас туплявны...

<>

• * *

Ми баситам лавкаысь ньӧбӧм кельыдлӧз коз. Ми гӧрда-виж кабалаысь вундалам лымчиръяс. Ми вурам Кӧдзыд пӧльлы да Лымнывлы пасьяс... Ми бара на надейтчам ловзьӧдлыны Выльвося кӧрсӧ...

<>

• * *

А тэ некодысь эн пов, Греклы личӧдӧмтӧ корсям. Збыльыс — сӧмын нянь да сов, Сэсся ставыс тані ворсӧм. Кытчӧ кӧсъян, сэтчӧ-й мун, Кӧсъян - карӧ, кӧсъян - вӧрӧ. Збыльыс сӧмын вой да лун, Сэсся ставыс тані сӧрӧм...

<>

• * *

Ен да му костас Ола-лэбала, Паськыд ловшыӧ Мырся-велала. Ог тӧд, лым чирӧн Али кодзулӧн Усьны кок улад, Мед тэ коддзылан...

<>

• * *

Тӧлыс воис виччысьтӧг. Мыссьытӧг ни бритчытӧг Пелысь коръя вольпасьӧ Кӧзяинӧн базгӧдчис. Муыс быдсӧн лайкмунліс, Ӧдва-й петіс радлуныс. Сэсся вунлӧм верӧссӧ Сывйыштіс да ланьтӧдчис...

<>

• * *

Сьӧрсьӧн-бӧрсьӧн Быгалӧны войяс. Эжва юлӧн Берег пӧлыс - Ойя! Потшӧс бокын Вжъюр сора нигӧн... - Мыйкӧ нӧшта?.. - Нинӧм, Енмӧй, нинӧм...

<>

• * *

Тайӧ мэ тэнад уяла вӧтад, Али тэ менам ун пытшкӧ шедін? Ме нин йӧткыштчи. Колӧкӧ, вӧтӧд... Тайӧ еджыднас этадзи зэрмис, Али лымъялӧ посни лымчирӧн? Ме виччыся тэнӧ. Эн тэрмась...