Пос

<>

• * *

А. И. Вурдовлы

Мед тэнӧ вӧр-ваыс ёна на видзӧ, Сьӧлӧм пытшкад мед кыпалӧ лов. Тэнад шаньлуныд быдӧнлы йиджӧ, Югыд му вылас дырджык на ов. Тэнад гижӧдъяс шонтӧны сьӧлӧм, Найӧс лыддьыны окота пыр. Енмыс уджачлун сетӧма, вӧлӧм, Тэнсьыд пӧжасъяс йӧзӧдны дыр. Мед тэныд Удора вын сетас уна, Йирваысь васӧ помтӧг на юны. Чӧскыд юквасӧ чериысь пуны, Мулы и валы пӧсь аттьӧ шуны.

<>

• * *

Синва кисьтӧ вӧр-ва, зэрасьӧ быд лун. Удж вылын со ставсӧ личкӧ крепыд ун. Шонді дзебсис ылӧ, ньӧти оз ёр син, Колӧ, эськӧ, сетны сылы петанін. Югӧрнас мед шонтас сійӧ небыд мусӧ, Челядь котыр тыртас сэки шоныд юсӧ. Бара лоас гажа, сьӧлӧм сьылан кад, Татшӧм поводдялы ставным лоам рад.

<>

• * *

Мый тэд сетӧ Ыджыд лун? Енлы эскӧм мед эз вун. Сетӧ мортлы олӧм вын, Сьӧлӧмыд мед эз вӧв кын. Кужин буртор мед тэ вӧчны, Отсасьны, дерт, пӧльлы-пӧчлы. Нем жалиттӧг уджӧ пырны, Быдторсӧ мед вермин нырны. Рӧдвуж вичкоӧ тэ нуӧд, Пернапас чӧвтны эн вунӧд. Ставыс артмас вывті бур, Он кӧ нинӧмӧн тэ дур.

<>

• * *

Тулыс варов, югыд, лӧсьыд, Медся муса менам кад. Петавлӧ нин уджын пӧсьыд, Татшӧмторлы ме зэв рад. Тулыс тӧвкӧд косьӧ воис, Оз лэдз лымъявны нин му. Шонді югӧръяссӧ койис, Ӧвтӧ варов шоныд ру. Меным сьӧлӧм вылын долыд, Гортын ола, радла пыр. Тані бура ветлӧ лолыд, Збыльмис кӧсйӧм, сё майбыр!

<>

• * *

Е. Д. Плаксинлы

Ті миян Удоралӧн муса пи, Эз ӧти мортӧс бурдӧд кужысь ки. Пыр шань да небыд тіян коми кыв, И локтысь-мунысьлы дась мелі сыв. Зэв кыпыда ми пасъям чужан лун, Мед водзӧ кольӧ тіян вежӧрлун. Мед нӧшта олӧм вӧлі турунвижа луд, Ми сиам дзоньвидзалун, помтӧм шуд.

<>

• * *

И. К. Устиновалы

Ылі Латьюдін грездын 90 во сайын Ӧзйис яръюгыд кодзув миян Удора весьтын. Мича ним улын бать-мам сійӧс лэдзисны светӧ, Мед не яндысьны эз ковмы ныв понда некор. Содз тыр дзоньвидзалун вӧлі сетӧма аньлы, Мед сэсся нэм чӧжыс сійӧ эз тӧдлы арлыд. Небыд сьӧлӧма, тӧлка, шань мортлы Вичмис оласног сертиыс ордым, Сюрліс уджыд майбырлы пож тыр, Таысь пӧсь аттьӧ шуӧны войтыр. Норасьны, шогсьыны кад эз и вӧвлы, Пыр колі уджтасъяс олӧмӧ пӧртны. Кужӧмӧн артавны ставсӧ быд лун, Мед сӧмын нинӧм юрысь эз вун. Ӧні со шойччан кад эм сылӧн уна, Но сьӧлӧмыс важ моз пӧся на пуӧ. Быдтор на удитлӧ, эм вежӧрлун, Оз личкы сійӧс некутшӧм ун. Сиам ми овны на сё воысь водзӧ, Зэракодь лунъяс мед овлісны шоча, Ставнымлы шуд вылӧ овны да вывны, Киын ни кокын висьӧм не кывны.

<>

• * *

Медся чӧскыд вӧлі мамлӧн сёян-юаныс, Медся шуда вӧлі сыкӧд олӧм-вылӧмыс, Медся уна вӧлі сэні шоныд-югыдыс, Медся мыла вӧлі сэні шыладыс. Донаӧй мамӧй, бура видзлін тэ менӧ. А ӧні ме, эськӧ, помтӧг жалиті тэнӧ. Эг уджӧд, ни мырсьӧд, сӧмын бурджыка шойччӧді, Став чукыртӧ тэнсьыд, эськӧ, шыльӧді-мольӧді. Пыр тшӧкыда паметьӧ волан тэ меным. Быдторсӧ висьталі, эськӧ, ме тэныд. Донаӧй, мусаӧй, медся бур мортӧй. Век на син водзын, йитӧдъяс ортӧм.

<>

• * *

В. Мельниклы

Дона Вера, авъя морт, Медся матысса нывъёрт. Тэкӧд тӧдса быдса нэм, Ме зэв шуда, мый тэ эм. Олӧм тэнад абу лёк, Пыр на нуӧдан урок. Юр он уськӧд, век на том, Лӧсьӧдны на верман чом. Пиян-моньяс юра-вемӧсь, Бабӧн шуысьяс нин эмӧсь. Дзоньвидзалун мед на лоӧ, Мед на жӧник пуыд волӧ. Сэки бара ставӧн волам, Кӧлысь вылад кӧ тэ коран. Ставыс лоас вывті бур, Пӧттӧдз юам юмов сур.

<>

• * *

Е. Покровскаялы

Кык «5» ӧтпырйӧ шуд вылӧ усис, Морӧс радысла пӧсь вирӧн пузис. Муса верӧскӧд быдтінныд пиян, Ставыс тырвыйӧ эм ӧні тіян. Оз позь норасьны, шогавны нинӧм, Уна буртор ме кӧсъя тэд сины. Сӧстӧм ванас мед мыссьӧдӧ Мозын. Сьӧлӧм тіпкӧ мед ас стрӧйтӧм позйын. Мед Разыбса нюр-вӧрыс азыма вотчӧдӧ. Дзоридза град йӧрыд лов-рутӧ шойччӧдӧ.

09.12.2012 г.

<>

• * *

Кыдз Енлӧн шуӧма, сідзи и ов. Олан туй вуджигӧн восьлав, эн пов. Асьтӧ эн жалит, пыр сьӧкыдлун вен, Шудтӧ да вынтӧ сетас тэд Ен. Мырсьысьлы, висьысьлы нюжӧд тэ ки, Став олӧм-вылӧмыд югзяс кыдз би. Ёнман тэ ёртъясӧн, кокняммас удж, Тэ сӧмын пӧсявлы, сосъястӧ пудж. Сэк тэнӧ кабырас некод оз дзескӧд, Дзик ставыс артмас, тэ сӧмын эскы.