Просмотр кода страницы Эрзянь келень сёрмадомань (орфографиянь) лувтне (норматне)

===Гласнойтнень ды согласнойтнень сёрмадомаст===
1. Валонь васенце слогсо калгодо парной1 согласнойтнень мельга сёрмадовить а, о, у, э, ы букватне: лаз, сод, туло, сэдь, сыргамс; чевте парной согласнойтнень мельга – я, ё, ю, е, и букватне: сёрма, сянго, сюро, теле, ривезь.
2. Валонь васенце слогсо аволь парной согласнойтнень мельга сёрмадовить а, о, у, е, и букватне: панго, понгомс, пеке, пильге, чаво, чуро, черь, чире.
3. Валонь аволь васенце слогсо ы, и гласнойтне сёрмадовить: 
 а) -ыне, -ине суффикс марто валтнэсэ: кудыне, велине, парыне, пижине; 
 б) глаголонь формань теиця суффикстнэсэ (-ы, -и, -ый, -ий, -ыця, -иця, -викс причастиянь суффикстнэсэ): моры нармунь, тардий кедть, сокиця машина, вечкевикс ломань;
 в) глаголонь ютазь шкань ды условной наклонениянь форматнесэ: морынь, видинь; морылинь, видилинь; морындерян, видиндерян.
 Теде башка ы, и ды у гласнойтне аволь васенце слогсо вастневить стакалгавтозь (сложной) ды лия кельстэ саень валсо: менелькирькс (менель, кирькс), пиципалакс, картуз, радио.
 4. Ь буквась свал сёрмадови чевте парной согласнойтнень мельга ансяк валонть песэ, валонть куншкасо жо – ансяк калгодо согласнойтнень икеле парной согласнойтнень чевтечист невтемга: кедь, каль, човонь; кедьстэ, карькс, но кедте, тенсть, вирне (чевтечинь коряс аволь парной калгодо согласнойтне истят: б, в, г, ж, к, м, п, ф, ч, х, ш).
5. Чевте л согласноенть мельга кода валонть песэ, истя валонть куншкасояк свал путови ь буквась: вальма, кельме, кальть, кельть, кальсэ, сильге, эльде; ь буквась а путови ансяк кавто чевте л юткс, те эрси саезь валтнэсэ: иллюстрация, аллея.
6. Молиндеряйть рядсек зярыя чевте парной согласнойть, чевтечись невтеви ансяк меельценть: тенсть, тенстьке, тансть, сэредсть.
7. Дроб, степ, морков, озим рузонь кельстэ саезь валтнэсэ прядыця согласнойтне ёвтавить калгодосто. Сынь сёрмадовить (ь) чевте тешкстэме - знактомо: морков, морковсо, морковс, морковсто; степ, степсэ, степстэ, степс; озим, озимсэ, озимстэ, озимс; дроб, дробсо, дробсто, дробс.
8. Валъюронь -нг, -нк, -нч гайттень вастовомасо чевте тешкс а сёрмадовкшны: пенге, пенч, венч, пинге; теке правиланть коряс сёрмадовить неть гайттнень васодевкстнэ глаголонь ламокирдань теевкстнэсэяк: конямс – кончнемс, манямс – манчемс, мендямс – менчемс.
9. Валъюронь ды валлувонь прядыця гайтев согласнойтнень кортамосо гайттемекс ютамост сёрмадомсто а невтеви кода валонь формань, истя жо од валонь теевемстэяк:
1) числань, падежень, лицянь форматнень теевемстэ (кирдеви мельсэ морфологиянь принципесь): сод – содт, содсо, сёрмадомс – сёрмадсь, сёрмадтано, сёрмадт, нельгемс – нельгсь, нельгтяно;
2) суффикс вельде од валонь теевемстэ (одс теезь валтнэ сёрмадовить морфологиянь принципенть коряс): недь – недькс, озяз – озязке, виздемс – визькс, куземс – кузтема; нерьгемс – нерьгстамс, пургамс – пургсемc;
3) аффиксоид вельде од валонь теевемстэ: вайгельпе, тарадпе, ведьпря, кальпря, марпря, инзейпуло, кальпуло, килейпуло; 
 10. Валонь юрсо согласноень гайтевчинь полавтомась невтеви стакалгавтозь (сложной) числительнойтнень сёрмадомсто (мельсэ кирдеви фонетикань принципесь): кемгавтово, кемголмово, кемготово, кемзисемге, кемгавксово, колоньгемень, ниленьгемень, ведьгемень, кодгемень, кавксоньгемень, вейксэньгемень. Сядотнень лемест сёрмадомсто мельсэ кирдевить кавонест принциптне: морфологиянсеськак (-сядт пелькссэнть ванстови д гайтенть гайтевчизэ), фонетикансеськак (-сядт пелькссэнть прась меельце гласноесь): кавтосядт, колмосядт, нилесядт, котосядт, сисемзядт, кавксосядт, вейксэсядт. 
11. Валонь юрсо согласноень гайтевчинь полавтомась а невтеви стакалгавтозь (сложной) валтнэнь сёрмадомсто (кирдеви мельсэ морфологиянь принципесь): валсюлмавкс (вал, сюлмавкс), ведькев (ведь, кев), вирьсараз (вирь, сараз), товcюро (тов, сюро), сэнькев (сэнь, кев), пейсывель (пей, сывель), медьков (медь, ков), письмаркудо (письмар, кудо), седейпелькс (седей, пелькс).

===Лия кельстэ саезь валтнэнь сёрмадомаст===
1. Кезэрень саезь валтнэ сёрмадовить традициянь коряс: бука, луга, церепка.
2. Од саезь валтнэсэ сеедьстэ вастневикс полавтоматне истят: а) бути существительноень васень формась рузонь кельсэ прядови зярыя согласнойсэ ды тень пингстэ меельце согласноесь сонорной, эрзянь кельс ютазь валось кувалгавтови а (орф. а, я) гласнойсэ: центра, ансамбля, корабля, комбайна (рузкс – центр, ансамбль, корабль, комбайн); б) бути существительноень васень формась рузонь кельсэ прядови о, э (орф. о, ё, е) гласнойтнесэ, эрзянь кельсэ саезь валонть васень формасонзо неть гласнойтне полавтовить а (орф. а, я) гласнойсэ, тень пингстэ, улиндеряй явиця чевте тешкс, сон полавтови и гласнойсэ: пера, ружия, причастия, хозяйства, ведра (рузкс – перо, ружьё, причастие, хозяйство, ведро).
3. Саезь валтнэ-прилагательнойтне сеедьстэ теевить -нь суффиксэнть вельде: колхоз – колхозонь, театра – театрань; бути саезь валось – прилагательноесь а ливтеви лия саезь валсто, сонзэ васень формазо тееви рузонь валлувонтень -а, -ой, -ей пелькстнэнь поладозь: бойка, главной, средней (рузкс – бойкий, главный, средний).
4. -ск согласной лангс прядовиця саезь лемтнень косвенной падежень формаст теевить -ой, -ое пелькстнэнь поладозь: Саранскойга, Саранскоень, Курскойга, Курскоень.

===Стакалгавтозь, кавонзазь ды киртязь валтнэнь сёрмадомаст===
Кавто юронь валтнэнь сёрмадомаст 

Кавто юронь валтнэ сёрмадовить вейсэ:
	 1) васенце пельксэсь – суффикстэме существительной: авакаль, бабаловсо, ведьтол, гуйкал, дигалопа, калькуро, лепекал, модамекш, сокапенч, толкель; 
	 а) омбоце пельксэсь – недь ды туло суффиксэнь смустень кандыця ды суффиксэнь таркас сайневиця валтнэ: койменедь, локшонедь, пеельнедь, пелюманедь, пенчнедь, ульманедь, боцькатуло, нолготуло; 
	 б) омбоце пельксэсь – потмо, чире, куншка вейсэндявтомань енкс марто валтнэ: вирьпотмо, нешкепотмо, кудопотмо, пряпотмо, лейчире, паксячире, пандочире, велекуншка, паксякуншка, обедкуншка, седейкуншка;
	 в) омбоце пельксэсь – коня валось, бути сон саеви а виде смустьсэ: баняконя, пичеконя, пандоконя, кудоконя, тумоконя, но ломань коня, бука коня, реве коня;
	 г) омбоце пельксэсь – пелькс, икелькс, удалкс, ёнкс, левкс валтнэ: седейпелькс, кудыкелькс, пиреудалкс, кедьёнкс, обедъёнкс, каткалевкс, кискалевкс, письмарлевкс, ревелевкс, сеялевкс, озязлевкс;
	 д) омбоце пельксэсь – -мо суффикс вельде теезь существительной: кенкшкундамо, кипурдамо; 
 2) васенце пельксэсь – васонь, ине валтнэ: васонькоморо, васоньпеельть, иневедь, инелей, Инечи;
	 3) васенце пельксэсь – ве числительноесь ды пеле, пель, пельс валтнэ: велув, вепекень, пелеве, пельспиезь, пельсшумбра;
	 4) васенце пельксэсь – трокс валось: троксвал, троксмель, трокспильге, трокспалмань, трокспикс;
	 5) васенце пельксэсь – алга, ланга валтнэ: алгавайгель, алгапанар, алгапонкст; 
	 6) васенце пельксэсь – -и/-ы суффикс марто причастия: палымода, пиципалакс, педигуй, велиривезь, нулныпиле;
	 7) валонь кодамояк пельксэсь неень шкань кельсэнть а чарькодеви: какжаля (какж-? + аля), пиненьбапст (пинень + бапст?).
		
Кавто юронь валтнэ сёрмадовить башка:

	1) бути васенце пельксэсь – суффикс марто существительной:	 авака левкс, атяка левкс, пешкс гуй; 	 
	2) бути васенце пельксэсь – -нь суффикс марто вал: велень бука, Каргонь ки, кудонь прявт, бабань пеште, тувонь сюкоро, ракань кудо, сумань пракстат, атянь пуре, чинь аштема, овтонь пизэ, вайгелень каятома. 
Башка тешкс: вараканьпал, салмуксоньсалы, чееренькарькс, вардоньсюро, вереньпоти валтнэ (традициянь принципенть мельсэ кирдезь) сёрмадовить вейсэ.
	3) бути васенце пельксэсь – -ма, -мо суффикс вельде теезь вал: велямо мукорь, кортамо пелькс, ловнома кудо, ознома кудо, печкема тарка, верьгедема кев.
	Башка тешкс: пивтемпарь, содамоёвкс валтнэ сёрмадовить вейсэ (традициянь принципенть мельсэ кирдезь). 
4) бути васенце пельксэсь – числительной:
	кавто пильгесэ ниле иень
	кото лазт кавксо умарть

	5) бути васенце пельксэсь – причастия (сетнеде башка, конат теевить -и/ -ы суффиксэнть вельде):
	празь умарь соказь мода керявт тикше
	морыця тейтерь чииця цера артовт лаз
	
6) бути омбоце пельксэсь -ма суффиксэнть вельде глаголсто теезь существительной: кедь кирдема, стядо аштема, стяко аштема, седей кирдема, тикше ледема.
Башка тешкс: чилисема, чивалгома валтнэ сёрмадовить вейсэ.

Колмо ды ниле юронь валтнэнь сёрмадомаст
 
Колмо юронь валтнэ сёрмадомаст коряс явовить зярыя кужова: 
1) весе пелькстнэ сёрмадовить вейсэ: кудазорава, одирьва, урьваля. Те куронтень кандовить истя жо аффиксоид вельде теезь валтнэ, конатне меельце шкас эрзянь-мокшонь келень наукасонть лововсть стакалгавтозь валокс: калькуропря, кедькопорьланго, пельвайгельпе, пиципалакспуло;
2) весе пелькстнэ сёрмадовить башка: ашо пря цёра, покш пря корш, верьгизэнь пови киска, сисем прясо гуй, ёзнэнь пупамо тикше, пазонь чавома чувто, верень лоткавтыця тикше;
3) васень кавто юртнэ сёрмадовить вейсэ, колмоцесь – башка: галаумарь тикше, дураккуяр недькс, ёнтол кель, кедьнимиляв левкс, овтумарь чувто, верьтомбамо максо, чивалгома ёнкс, чилисема ёнкс; 
4) омбоце ды колмоце юртнэ сёрмадовить вейсэ, васенцесь – башка: авака ривезьлевкс, ашо дуракпанго, вишка пиципалакс, петнав карвопанго, бабань пиципалакс. 
Ниле юронь валтнэде аволь пек ламо. Сынст сёрмадомсто эряви нежедемс кавто юрсто аштиця валтнэнь сёрмадома лувост лангс: од авань чама лопа, тантей чине галань цеця.

Кикске вельде сёрмадовить: 
1) кавонзавозь валтнэ, конатнень пельксэкс ашти вейке секе жо валось: лангсек-лангсек, таркань-таркань, кувтолк-кувтолк, цють-цють, тик-тик, мезе-мезе, косо-косо, вана-вана;
2) кавонзазь валтнэ, вейкесь эйстэст гайгемань коряс аламодо полавтозь: юв-яв, куш-каш, кулдор-калдор, цютор-цятор, тушто-ташто, турномс-тарномс, тулномс-талномс;
3) кавонзазь валтнэ, конатнесэ васенце валось смустень коряс аравтови карадо-каршо омбоцентень: атят-бабат, тей-тов, теде-тонадо, тестэ-тосто, тия-тува, толонь-ведень пачк, раужо-ашо, велькст-алкст, верьга-алга, лисемс-совамс;
4) кавонзазь валтнэ, конатнесэ кавонест пелькстнэ лововить синонимекс: тапамс-калавтомс, тапамс-янгамс, тердемс-пурнамс, тетякай-корьмакай, трямс-кастомс, ракамс-пейдемс, васькамс-кольнемс, вели-чары, виде-паро;
5) кавонзазь валтнэ, конатнесэ кодамояк пельксэсь (валось) ёмавтызе эсензэ смустензэ: чекамс-покамс, нулат-валат, луткова-латкова, кудат-андат;
6) кавонзазь валтнэ, конатнесэ кавонест пелькстнэ вейсэ невтить седе келей чарькодема: кепе-штапо, тевть-кулят, тевть-ладт, ойть-велькст, валт-кельть, вирть-укшторт, татарт-башкирт, тевть-койть, тевга-валга, теемс-кемекстамс, тетят-покштят, тештев-ковов, токамс-кепетемс, тикшеть-лопат, ламбамо-ризаня, трицят-сокицят, трокс-кувалт;
7) кавонзазь валтнэ, конатнесэ кавонест пелькстнэ кандыть артовксонь смусть: пиже-ожо, тюжат-ашот, ашназа-ашо, ашназа-сэнь, ашназа-якстере, якстере-сэнь, валдо-тюжа, валдо-сэнь;
8) кавонзазь валтнэ, васенце пельксэсь эйсэст кой-, та-, таго- эли омбоцесь -бути частицатне: кой-мезе, таго-мезе, та-ки, та-кодамо, таго-зярдо, кой-косо, кой-конатне, кие-бути, мезе-бути, кона-бути;
9) кавонзазь валтнэ, бути эйсэст васенце пельксэсь недля валось, омбоцесь числительной: недля-кавто, недля-колмо; недляшка-кавтошка, недляшка-колмошка;
10) кавонзазь валтнэ, вейке пельксэсь эйстэст теемс валось: витемс-теемс, сускомс-теемс, ардомс-теемс, ваномс-теемс, кундамс-теемс, сокамс-теемс; теемс-кемекстамс, теемс-мендемс, теемс-витемс, теемс-якавтомс.
11) Сложной киртязь валтнэ ды аббревиатуратне васень формасост сёрмадовить рузонь келень правилатнень коряс. Весе сынь полавтневить падежга: аббревиатуратнень полавтнемстэ сюлмиця гласноесь падежень суффиксэнть икеле а сёрмадови (куш ёвтави): РМ (эрэм).

===Существительнойтнень сёрмадомаст===
	
Кода одс теезь существительнойтне, истя существительноень форматнеяк сёрмадовить морфологиянь принципенть коряс.
	
Ламочинь форматнень сермадомась

Аволь невтемачинь полавтнемась
	-Т суффиксэсь сермадови сестэ, зярдо валось прядови:
 – удалце рядонь гласной лангс: кудо – кудот, пакся – паксят, вальма – вальмат;
	– калгодо парной согласной лангс, невтемга: кикс – кикст, ваз – вазт, кардаз – кардазт, ирдез – ирдезт; 
	– аволь парной согласной лангс, конань икеле ашти удалце рядонь гласной: ков – ковт, морков – морковт.
	-Ть вариантось сермадови сестэ, зярдо валось прядови:
 – икельце рядонь гласной лангс: пире – пиреть, пизэ – пизэть, чи – чить;
	– чевте парной согласной лангс: каль – кальть, седей – седейть, парь – парть, ривезь – ривезть;
	– аволь парной согласной лангс, конань икеле ашти икельце рядонь гласной: кеж – кежть, кев – кевть, пенч – пенчть, тев – тевть.
	Башка тешкст.
	 1.Существительнойтнень ламонь числань формаст теевемстэ валлувось а полавтови (меельце слогсонть гласноесь а пры): 
	зепе – зепеть, аволь зепть
	кенде - кендеть, аволь кендть
	ленге – ленгеть, аволь ленгть
	очко – очкот, аволь очкт
	панго – пангот, аволь пангт
	пеке – пекеть, аволь пекть
	сельме – сельметь, аволь сельмть
	теште – тештеть, аволь тештть
	чувто – чувтот, аволь чувтт

2. Кавонзазь существительнойтнесэ валлувтнэ истя жо а полавтовить:
	пильгеть-кедть
	пештеть-товт
	эрьгеть-човалят
	
3. Прядовиндеряй существительноенть валлувозо -т или -ть согласнойсэ, сестэ ламонь числань форматнень теевемстэ сёрмадовить кавонзазь -тт, -тть:
 атявт – атявтт
	прявт – прявтт
	тенсть – тенстть
	смусть – смустть

Невтемачинь полавтнемась.
 -Тнэ суффиксэсь сёрмадови, зярдо валось прядови 	калгодо парной согласной лангс: кал – калтнэ, мастор – мастортнэ, верьгиз – верьгизтнэ, сараз – саразтнэ, тарад – тарадтнэ, прявт – прявттнэ, пикс – пикстнэ. Весе лия валлувтнень мельга саеви -тне суффиксэсь: эйкакш – эйкакштне, чакш – чакштне, ков – ковтне, кев – кевтне, ош – оштне, лув – лувтне, пире – пиретне, пакся – паксятне, пизэ – пизэтне, кудо – кудотне; кедь – кедтне, каль – кальтне, килей – килейтне; кенкш – кенкштне, венч – венчтне.
	
1  Падежень форматнень сёрмадомаст

Аволь невтемачинь форматне
Родительной падежесь. Сонзэ суффиксэзэ -нь, конась поладови гласной валлувтненень сеске: кудо – кудо-нь, веле – веле-нь. Зярдо валлувось прядови согласнойсэ, тевс нолдавить сюлмиця гласнойтне:
-о- сюлмиця гласноесь тевс нолдави сестэ, зярдо валлувось прядови калгодо согласнойсэ, улиндеряй икелензэ удалце рядонь гласной: укштор – укштор-о-нь, ваз – ваз-о-нь, кал – кал-о-нь; ков – ков-о-нь, улав – улав-о-нь;
-е- сюлмиця гласноесь саеви сестэ, зярдо валлувось прядови: 1) чевте согласнойсэ: каль – кал-е-нь, кедь – кед-е-нь, седей – седе-е-нь, сексь – секс-е-нь; 2) калгодо аволь парной согласнойсэ, улиндеряй икелензэ икельце рядонь гласной: пенч – пенч-е-нь, кем – кем-е-нь;
-э- сюлмиця гласноесь саеви сестэ, зярдо валлувось прядови калгодо парной согласнойсэ, улиндеряй икелензэ икельце рядонь гласной: кикс – кикс-э-нь, пикс – пикс-э-нь, верьгиз – верьгиз-э-нь. 
Неть сюлмиця гласнойтне истямо жо ёнкс марто тевс нолдавить вносительной, направительной, превратительной ды сравнительной падежень форматнень теевемстэ. 
Дательной падежесь. Суффиксэнть вариантонзо – -нень/-нэнь.
-Нэнь вариантось саеви сестэ, зярдо валлувось прядови калгодо парной согласнойсэ: кикс – кикс-нэнь, ваз – ваз-нэнь, тешкс – тешкс-нэнь. Весе лия валлувтнень мельга саеви -нень вариантось: ава – ава-нень, веле – веле-нень, сэдь – сэд-нень, эйкакш – эйкакш-нень, тов – тов-нень, тев – тев-нень. 
Отложительной падежесь. Сонзэ суффиксэнь вариантонзо зярыя: -то/-те/-тэ/-до/-де/-дэ.
-То вариантось саеви, прядовиндеряй валлувось:
1) гайттеме калгодо парной согласнойсэ, конань икеле ашти удалце рядонь гласной: каркс – каркс-то, мацт – мацт-то; 
2) калгодо аволь парной согласнойсэ, конань икеле ашти удалце рядонь гласной: атякш – атякш-то, чакш – чакш-то, эйкакш – эйкакш-то;
3) гайтев д согласнойсэ, конань икеле ашти удалце рядонь гласной: сад – сад-то, тарад – тарад-то;
-те вариантось саеви, прядовиндеряй валлувось:
1) гайттеме чевте парной согласнойсэ: сёксь – сёкс-те, пенксь – пенкс-те;
2) гайттеме аволь парной согласнойсэ, улиндеряй икелензэ икельце рядонь гласной: мекш – мекш-те, пенч – пенч-те, венч – венч-те;
3) чевте д гайтьсэ: медь – мед-те, ведь – вед-те;
-тэ вариантось саеви сестэ, зярдо валлувось прядови гайттеме калгодо парной или д согласнойсэ, улиндеряй икелест икельце рядонь гласной: тешкс – тешкс-тэ, ризкс – ризкс-тэ, обед – обед-тэ;
-до вариантось саеви, прядовиндеряй валлувось:
1) удалце рядонь гласнойсэ: вальма – вальма-до, пакся – пакся-до, судо – судо-до, нурдо – нурдо-до;
2) гайтев калгодо парной согласнойсэ (д согласнойденть башка), конань икеле ашти удалце рядонь гласной: панар – панар-до, кардаз – кардаз-до, вакан – вакан-до;
3) гайтев аволь парной согласнойсэ, конань икеле ашти удалце рядонь гласной: лав – лав-до, ков – ков-до, улав – улав-до; 
-де вариантось саеви, прядовиндеряй валлувось:
1) икельце рядонь гласной лангс: веле – веле-де, пире – пире-де, пизэ – пизэ-де;
2) гайтев чевте парной согласной лангс: сёвонь – сёвон-де, парь – пар-де, каль – каль-де;
3) чевте аволь парной й согласноенть лангс: седей – седей-де, килей – килей-де, ой – ой-де, кой – кой-де;
4) аволь парной гайтев согласной лангс, конань икеле ашти икельце рядонь гласной: кем – кем-де, кев – кев-де, тев – тев-де;
-дэ вариантось саеви сестэ, зярдо валлувось прядови калгодо парной гайтев согласнойсэ, улиндеряй икелензэ икельце рядонь гласной: верьгиз – верьгиз-дэ, вирез – вирез-дэ;
Местной падежесь. Суффиксэнть вариантонзо – -со/-сэ.
-Со вариантось саеви, прядовиндеряй валлувось:
1) удалце рядонь гласной лангс: моро – моро-со, пакся – пакся-со;
2) калгодо парной ды аволь парной согласнойсэ, аштиндеряй икелест удалце рядонь гласной: рудаз – рудаз-со, пор – пор-со, вал – валсо, сур – сур-со; улав – улав-со, сельмукш – сельмукш-со;
-сэ вариантось саеви, прядовиндеряй валлувось:
1) икельце рядонь гласной лангс: веле – веле-сэ, пизэ – пизэ-сэ;
2) чевте парной согласной ды й гайтенть лангс: ведь – ведь-сэ, умарь – умарь-сэ, седей – седей-сэ, ой – ой-сэ;
3) калгодо парной ды калгодо аволь парной согласной лангс, аштиндеряй икелест икельце рядонь гласной: пикс – пикс-сэ, кем – кем-сэ, кев – кев-сэ.
Исходной падежесь. Суффиксэнть вариантонзо – -сто/-стэ. Сынь тевс нолдавить истя жо, кода местной падежень суффикстнэяк. 
Вносительной падежесь. Сонзэ суффиксэзэ -с, конась поладови кода гласной, истя жо согласной лангс прядовиця валлувонтень сюлмиця гласнойтеме: вальма – вальма-с, кудо – кудо-с; кев – кев –с, ков – ков-с, кель – кель-с, каль – каль-с, вал – вал-с, кем – кем-с, ош – ош-с, мастор – мастор-с. Прядовиндеряй валонть лувозо зярыя согласнойсэ, ды тень пингстэ меельцесь эйстэст -с, сестэ падежень суффиксэсь поладови валлувонтень сюлмиця гласной вельде:
-о- сюлмиця гласноесь тевс нолдави сестэ, зярдо валлувось прядови зярыя согласнойсэ, конатнень эйстэ меельцесь калгодо -с, а икелест ашти удалце рядонь гласной: суркс – суркс-о-с, тапаркс – тапаркс-о-с; 
-е- сюлмиця гласноесь саеви сестэ, зярдо валлувось прядови зярыя согласнойсэ, меельцесь конатнестэ чевте -сь: сёксь – сёкс-е-с, пенксь – пенкс-е-с;
-э- сюлмиця гласноесь саеви сестэ, зярдо валлувось прядови зярыя согласнойсэ, меельцесь конатнестэ калгодо -с, а икелест – икельце рядонь гласной: кикс – кикс-э-с, пикс – пикс-э-с, репс – репс-э-с. 
Направительной падежесь. Сонзэ форманзо теевить ансяк таркань невтиця существительнойтнень эйстэ -в суффиксэнть вельде. Прядовиндеряй валлувось гласной лангс, сестэ суффиксэсь поладови валлувонтень сюлмиця гласнойтеме, прядовиндеряй согласной лангс, сестэ тевс нолдавить -о-, -е-, -э- сюлмиця гласнойтне: ош – ош-о-в, мастор – мастор – мастор-о-в, кардаз – кардаз-о-в; сарай – сара-е-в; университет – университет-э-в. Сюлмиця гласнойтнень тевс нолдамост ванодо «Родительной падежесь» пельксстэнть.	
Переместительной падежесь. Сонзэ суффиксэнзэ: -ва/-га/-ка.	
-ва суффиксэсь саеви сестэ, зярдо валлувось прядови гласнойсэ: веле – веле-ва, вальма – вальма-ва, пакся – пакся-ва;
	-га суффиксэсь саеви сестэ, зярдо валлувось прядови гайтев согласнойсэ: вирь – вирьга, мастор – масторга, лей – лейга, ков – ковга, кев – кевга;
	-ка суффиксэсь саеви сестэ, зярдо валлувось прядови гайттеме согласнойсэ: селт – селт-ка, куракш – куракш-ка, тапаркс – тапаркс-ка.	
Превратительной падежесь. Сонзэ суффиксэзэ -кс. Прядовиндеряй валлувось гласнойсэ, суффиксэсь поладови сюлмиця гласнойтеме: эрьке – эрьке-кс, меште – меште-кс, пильге – пильге-кс. Прядовиндеряй валлувось согласнойсэ, тевс нолдавить сюлмиця гласнойтне: тарад – тарад-о-кс, кал – кал-о-кс, куз – куз-о-кс, ков – ков-о-кс, улав – улав-о-кс; сэдь – сэд-е-кс, парь – пар-е-кс, верь – вер-е-кс, венч – венч-е-кс; ризкс – ризкс-э-кс, пикс – пикс-э-кс, левкс – левкс-э-кс. Сюлмиця гласнойтнень саема тувталтнэ истят жо, кода родительной падежень форматнень теевемстэяк.
Сравнительной падежесь. Сонзэ суффиксэкс карми улеме -шка суффиксэсь, конась поладови валлувонтень сюлмиця гласной вельде, прядовиндеряй валлувось ж, ш, ч, з, с согласнойсэ: ваз-о-шка, ош – ош-о-шка, суркс – суркс-о-шка, венч-е-шка, кеж – кеж-е-шка, репс – репс-э-шка.
Сюлмиця гласноень саема ёнкстнэнь ванодо «Родительной падежесь» пельксстэнть. Лия таркасо суффиксэсь поладови валлувонтень сюлмиця гласнойтеме: пандо – пандо-шка, вирь – вирь-шка, тарад – тарад-шка, килей – килей-шка.
 Изъятельной падежесь. Сонзэ суффиксэнзэ – -втомо/-втеме/-томо/-теме / -тэме.
-Втомо суффиксэнь вариантось саеви удалце рядонь гласной мельга: кудо – кудо-втомо, пакся – пакся-втомо;
	-втеме вариантось саеви икельце рядонь гласной мельга: пире – пире-втеме, веле – веле-втеме, эрьке – эрьке-втеме;
	-томо вариантось саеви калгодо парной ды аволь парной согласной мельга, улиндеряй икелест удалце рядонь гласной: ваз – ваз-томо, тарад – тарад-томо, сёлт – сёлт-томо, ков – ков-томо, улав – улав-томо;
-теме вариантось саеви чевте согласной мельга или аволь парной согласной мельга, улиндеряй икелензэ икельце рядонь гласной: недь – нед-теме, сёксь – сёкс-теме, лей – лей-теме, седей – седей-теме; кев – кев-теме, лем – лем-теме;
-тэме вариантось саеви калгодо парной согласной мельга, улиндеряй икелензэ икельце рядонь гласной: пикс – пикс-тэме, левкс – левкс-тэме. 

Невтемачинь ды азорксчинь полавтнематне.
1. Невтемачинь полавтнемань именительной падежень вейкень числань формасо -сь невтемачинь суффиксэсь согласной валлувонтень поладови сюлмиця гласной вельде: укштор – укштор-о-сь, ваз – ваз-о-сь, кал – кал-о-сь; ков – ков-о-сь, улав – улав-о-сь; кедь – кед-е-сь, седей – седе-е-сь, сёксь – сёкс-е-сь; пенч – пенч-е-сь, кем – кем-е-сь; кикс – кикс-э-сь, верьгиз – верьгиз-э-сь. Кодамо сюлмиця гласной эряви саемс, ванодо «Родительной падежесь» пельксэнть. 
2. Неть сюлмиця гласнойтне истя жо тевс нолдавить ды сермадовить азорксчинь полавтнемань:
– именительной падежень весе кужонь форматнень теевемстэ: укштор-о-м, укштор-о-т, укштор-о-зо, укштор-о-нок, укштор-о-нк, укштор-о-ст; седе-е-м, седе-е-ть, седе-е-зэ, седе-е-нек, седе-е-нк, седе-е-ст; пикс-э-м, пикс-э-ть, пикс-э-зэ, пикс-э-нек, пикс-э-нк, пикс-э-ст; 
– вносительной падежень весе кужонь форматнень теевемстэ: укштор – укштор-о-з-о-н, укштор-о-з-о-т, укштор-о-з-о-нзо, укштор-о-з-о-нок, укштор-о-з-о-нк, укштор-о-з-о-ст; седе-е-з-э-нь, седе-е-з-э-ть, седе-е-з-э-нзэ, седе-е-з-э-нек, седе-е-з-э-нк, седе-е-з-э-ст; пикс-э-з-э-нь, пикс-э-з-э-ть, пикс-э-з-э-нзэ, пикс-э-з-э-нек, пикс-э-з-э-нк, пикс-э-з-э-ст.
3. Азорксчинь полавтнемань монь кужонь вейкень числань косвенной падежень ды ламонь числань форматнесэ падежень суффиксэнть мельга сёрмадови -н (-нь) суффиксэсь: тетя-н, тетядо-н, тетясо-н; пире-нь, пиреде-нь, пиресэ-нь. 
4. Азорксчинь полавтнемань тонь кужонь форматнень суффиксэст -т/-ть.
-Т суффиксэсь саеви:
а) удалце рядонь гласной мельга: ава-т, пакся-т, уло-т, судо-т;
б) калгодо парной ды аволь парной согласной мельга, конатнень икеле ашти удалце рядонь гласной: ваз – ваз-о-т, мастор – мастор-о-т, эйкакш – эйкакш-о-т, ававт-о-т;
	-ть вариантось саеви:
	а) икельце рядонь гласной мельга: пире-ть, веле-ть, сельме-ть;
	б) прядовиндеряй валлувось чевте согласной лангс: кедь – кед-е-ть, верь – вер-е-ть, седей – седе-е-ть;
	в) прядовиндеряй валлувось калгодо парной ды аволь парной согласной лангс, аштиндеряй икелест икельце рядонь гласной: лезкс – лезкс-э-ть, пикс – пикс-э-ть, тев – тев-е-ть, пенч – пенч-е-ть.
 
===Числительнойтнень сёрмадомаст===
1. Стакалгавтозь (сложной) числительнойтне сёрмадовить фонетикань принципенть коряс. Стакалгавтозь числительноекс лововить:
1) 11-стэ саезь 19-с:

 11 – кевейкее 14 – кемнилее 17 – кемзисемге 
 12 – кемгавтово 15 – кеветее 18 – кемгавксово
 13 – кемголмово 16 – кемготово 19 – кевейксэе
	
2) 21-стэ саезь 29-с:

 21 – комсьвейкее 24 – комсьнилее 27 –комсьсисемге
 22 – комськавтово 25 – комсьветее 28 – комськавксово
	 23 – комськолмово 26 – комськотово 29 – комсьвейксэе

3) 30-стэ саезь 90-с – десяткатнень лемест:

	30 – колоньгемень 60 – кодгемень
40 – ниленьгемень 70 – сизьгемень
50 – ведьгемень 80 – кавксоньгемень
 90 – вейксэньгемень

4) 200-стэ саезь 900-с – сядотнень лемест: 
 
	200 – кавтосядт 600 – котосядт
	300 – колмосядт 700 – сисемзядт 
	400 – нилесядт 800 – кавксосядт 
	500 – ветесядт 900 – вейксэсядт
	
Башка тешкст: сядотнень лемест сёрмадовить фонетикань- морфологиянь принципенть мельсэ кирдезь: -сядт омбоце пелькссэнть сёрмадови -д- буквась (морфологиянь принципенть коряс), куш маряви -т- гайтесь, ды а ванстови -о меельце гласноесь (морфологиянь принципесь колави).
2. Явовтыця (разделительной) числительнойтне сёрмадовить кикс вельде: колмонь-колмонь, комсень-комсень.

===Глаголтнэнь сёрмадомаст===
Кода одс теезь глаголтнэ, истя глаголонь форматнеяк сёрмадовить морфологиянь принципенть мельсэ кирдезь: глаголтнэнь полавтнемстэ ды од глаголтнэнь теевемстэ ванстовить (а колавить) морфематне (валонь юртнэ, валонь лувтнэ, суффикстнэ).
1. Валъюронь (валлувонь) ды суффиксэнь согласнойтнень аффрикатакс ютамост сёрмадомсто а невтеви кода глаголонь формань, истя од глаголонь теевемстэяк.
Глаголонь форматне:
	авардсь, аволь аварць
 вачкодсь, аволь вачкоць
	кандсь, аволь канць
	мадсь, аволь маць
	ледсь, аволь лець
Одс теезь глаголтнэ:
	авардемс – авардстемс, аволь аварцтемс
	ардомс – ардстомс, аволь арцтомс
	ваномс – ванстомс, аволь ванцтомс
	кадомс – кадстамс, аволь кацтамс
	кенеремс – кенерстемс, аволь кенерцтемс 
	кундамс – кундсемс, аволь кунцемс
	ладямс – ладсемс, аволь лацемс
	мадемс – мадстемс, аволь мацтемс
	педямс – педсемс, аволь пецемс
	пидемс – пидсемс (ям), но пицемс (пильгенть пиципалакссо)
	сатомс – сатстомс, аволь сацтомс
	сермадомс – сермадстомс, аволь сермацтомс
	чарькодемс – чарькодстемс, аволь чарькоцтемс
2. Валъюронь ды валлувонь прядыця гайтев согласнойтнень гайттемекс ютамост сёрмадомсто а невтеви кода глаголонь формань, истя жо од глаголонь теевемстэяк:
Глаголонь форматне:
	авардемс – авардтяно, авардтядо, авардсь, авардть	
	виздемс – виздтяно, виздтядо, виздсь, виздть
	гайгемс – гайгтяно, гайгтядо, гайгсь, гайгть
	кельгемс – кельгтяно, кельгтядо, кельгсь, кельгть
	кольгемс – кольгтяно, кольгтядо, кольгсь, кольгть
	козомс – козтано, козтадо, козсь, козт
	куземс – кузтяно, кузтядо, кузсь, кузть
	ледемс – ледтяно, ледтядо, ледсь, ледть
Од глаголтнэ:
	валгомс – валгстомс	
	калгодо - калгодкстомомс
	кельгемс – кельгстямс
	козомс – козкстамс
	куземс – кузтемс
	ливезь – ливезькадомс
	од – одкстомомс
	рангомс – рангстамс
 раужо – раужкадомс
	таргамс - таргсемс
	эряза – эрязкадомс
Башка тешкст:
1) прядовиндеряй глаголонть валлувозо -т согласнойсэ, кармавтома наклонениянь формасонть сёрмадовить истя жо кавонзазь -тт: уштомс – уштт, велявтомс – велявтт, кирнявтомс – кирнявтт;
2) -н- суффикс марто ламокирдань глаголтнэ, конатнень валлувост прядови -д- или -ж- согласнойсэ, сёрмадовить аволь ванькс морфологиянь, но фонетикань-морфологиянь принципенть коряс (валлувонь прядыця согласноенть ды -н- суффиксэнть ютксо ёвтави -т- гайтесь, кона невтеви сёрмадомстояк):
	андтнемс (андомс)
	ардтнемс (ардомс), но артнемс (артомс)
	кандтнемс (кандомс)
	кирдтнемс (кирдемс)
	нолдтнемс (нолдамс)
	панжтнемс (панжомс)
	синдтремс (синдемс)

3) Побудительной наклонениянь ламонь числань форматнесэ маряви ды сёрмадовияк -с- гайтесь: морастано, морастадо, мораст; сермадостано, сермадостадо, сермадост (ванстови -с- суффиксэнть кезэрень гайттемечизэ). Вейкень числань форматнесэ сон понгсь гласной юткс ды теевсь гайтевекс: моразан, моразат, моразо; сёрмадозан, сёрмадозат, сёрмадозо. 
4) 3-це лицянь ютазь шкань глаголонь формасонть сёрмадови кавонзазь -ссь, прядовиндеряй валлувось -с- согласнойсэ: максомс – макссь, макссть; лисемс – лиссь, лиссть. Кавонзась -сс сёрмадови объектэнь невтиця форматнесэяк: «монь» кужонь 2-це лицянь формасонть, макссамак; «сонзэ» ды «сынст» кужонь весе форматнесэ: максса, макссак, макссы, макссынек, макссынк, макссызь; макссынь, макссыть, макссынзе.
5) Арасьчинь форматнень теевемстэ саеви смустень кандыця глаголонть инфинитивень валлувозо, кона муеви инфинитивень суффиксэнть ёртозь: эзинь яка, эзинь виде, эзинь ловно; аволинь сода, аволинь мере, аволинь удо; иля сёрмадсто, иля сёвно, иля пиде.

===Наречиятнень сёрмадомаст===
1. Наречиятне сермадовить морфологиянь принципенть коряс: одсто, рузкс, чевтестэ (аволь чевтьстэ), начкосто (аволь начксто), коськестэ (аволь коськстэ). Ялатеке кона-кона наречиятнень сёрмадомсто морфологиянь принципесь кирдеви аволь педе пес: сеедьстэ (сееде).
2. Видестэ ды витьстэ наречиятне явовить смустень коряс: видестэ (виде) «правильно», витьстэ (вить) «прямо».
3. -кс суффикс вельде теезь наречиятне явовить превратительной падежень форматнестэ истямо ёнксонь коряс: превратительной падежень форматнесэ -кс суффиксэсь поладови валлувонтень сюлмиця гласной вельде, наречиятнесэ – сюлмиця гласнойтеме: татаркс «по-татарски», но татарокс – превр. падежень форма, рузкс «по-русски», но рузокс – превр. падежень форма. 

Лездыця кортамо пелькстнэнь сёрмадомаст

1. Валмельгакстнэ сёрмадовить морфологиянь принципенть коряс: кирьга видьга, кирьга видьс. Ялатеке кона-кона валмельгакстнэнь сёрмадомсто тевс нолдави фонетикань принципеськак: ланго ды пинге валтнэнь валмельгаксокс улемстэ -с, -со, -сто, -стэ падежень суффикстнэсэ гласной гайтесь пры: тарканть лангс, тарканть лангсо, тарканть лангсто; прявтонть пингстэ.
Башка тешкст.
Пинге валмельгаксось эряви явомс пинге существительноенть эйстэ, конанть полавтнемстэ ванстови, а пры валлувонь прядыця гласноесь: ХХ-це пингестэ, пингестэ пингес. 
2. Существительнойтнень ды сынст полавтыця (местоимениятнень ды субстантивированной) валтнэнь марто валмельгакстнэ сёрмадовить башка: 
ялганть вакссо, сонзэ марто, монь кисэ, микшницянть икеле, сазоронть кондямо.
Башка тешкст.	
 Ланго валмельгаксось неень шкань эрзянь кельсэ ловови аффиксоидэкс (суффиксэнь смустьсэ сайневиця валокс) ды сёрмадови вейсэ истямо смусть марто существительнойтнесэ: 1) «аштема тарка» – вальмаланго, калмоланго, каштомланго, киланго, лавсяланго, коникланго, латоланго, тингеланго; 2) «шка» – ледемаланго, нуемаланго, чокшнеланго. 	 Местной, исходной, вносительной, переместительной падежень суффикс марто неть валтнэсэ суффикстнэ ёмавтсызь песэ гласноенть: вальмалангсо, вальмалангсто, вальмалангс, вальмаланга.
	3. Бу, ли, жо частицатне сёрмадовить башка: истя жо, молемс бу, сы ли течи, сон жо мезеяк а соды;
	-а, -ая, -яя, -как, -гак, -як частицатне сёрмадовить вейсэ: совака, кундакая, мольтяя, састькак, сыньгак, сонзэяк;
	та-, кой-, бути- частицатне сёрмадовить кикс вельде: та-кода, кой-зярдо, мезе-бути.


[[Category:Эрзянь кель]]